立場新聞 Stand News

陳太與成智、志遠爭領功,政改更有機否決,yeah!

2015/5/20 — 13:57

陳方安生提出三大條件呼籲泛民通過政改,講話只要中央願意將公司票轉為個人票、增加民選提委會議席同埋調整四大界別嘅席數,泛民就應該轉軚投贊成票。

老實講,依三項條件同黃成智提出嘅都差唔多,但好肯定同一番說話從黃成智口中,轉為陳太口中講出嚟,只係會令到嗰幾項訴求或者條件更加難以實現。

大家諗下,如果中央喺投票前幾日重施故技,突然講到接納黃成智既提議,話唔定泛民真係有議員心動忍唔住轉軚,搞到政改通過咗。至於立左大功既黃成智?等政府比佢做下委員會主席,唔肯入官場咪攞多幾個公職,咁就乜都搞掂曬,話唔定黃成智先例一開,仲可以鼓勵更多泛民二線政治人物,積極咁用黨員身份喺黨內為政府搖旗吶喊,對中央既統戰工作都幾有利添。

廣告

但如果陳太提出類近訴求,喺表決前要求中共讓步,咁個講法就好唔同啦,要知道陳太作為所謂既港英餘孽,過往一直經常用「前政務司司長」個名四出外訪,喺西方國家既官場游走,講述中共點樣走數唔俾香港有普選,以維持佢喺政壇既影響力同地位,用左報既術語就係「唱衰中國」,而喺咁既前提下,如果中央表決前讓步,真係將公司票轉做個人票云云,只會做成「接納陳方安生訴求」既客觀效果,無疑肯定咗陳太過往串連外國官府向中央施壓既路線,要中共endorse依種「勾結外國勢力」既禁忌,話唔定仲難過香港有普選。

所以話,政府俾吓著數黃成智,等狄志遠立下功對佢無咩損失,但講到陳太呢……我諗中共真係寧願政改方案維持不變等否決,即係「寧願射落海都唔會益陳方安生」。

廣告

要知道喺無群眾壓力同運動既情況下,中央肯妥協讓步,十居其九都係覺得對方有值得收編既價值,同埋肯定對方既路線同埋政治手法,陳太叉隻腳落去「喺八三一決定下通過政改」既討論裡面,同黃成智狄志遠爭住領功,只會令到中共喺八三一框架下利誘泛民既機會更加渺茫,政改更加有機會否決,yeah。

發表意見