立場新聞 Stand News

陳帆的象徵意義

2018/4/9 — 7:23

資料圖片:陳帆

資料圖片:陳帆

如果在689年代,問責制庸官代表首推教育局局長吳克儉,去旅行多過返工,處事得過且過。他跟隨689下台而離開官場,林鄭上場,本來大家都寄望有一番新氣象,至少唔好再有類似吳克儉這類庸材獻世,哈,點不知有人辭官歸故里,有人漏夜趕科場,補上庸官呢個騎呢位,此人青出於藍,就是運房局局長陳帆。

上周立法會就一地兩檢條例草案舉行公聽會,陳帆以「甩轆」形容高鐵出軌事件,惹來經民聯議員兼行會成員林健鋒不滿,陳帆即稱甩轆可解作「車輪鬆脫」和「小瑕疵」,他所指是後者;公民黨立法會議員譚文豪反問何不直言「出軌」,陳帆反駁出軌可解釋為二人有婚外情(affairs),不如甩轆貼切,結果引來全場譁然。

佢另一次講汽車增長,就話「年輕人買唔到樓,又想自己有個空間,畀軀體同個靈魂出去遊走一下,就去買車。」喺一地兩檢嘅法案委員會上,就搶先代律政司司長鄭若驊回應關於《基本法》嘅問題,聲稱「或者唔識法律都可以講吓普通人嘅睇法」。今年三月在一地兩檢法案委員會會議上,尹兆堅問受到法律挑戰時,有冇後備方案,陳帆就提到香港係三權分立。哈,今次中正地雷,法案委員會主席葉劉淑儀立即指正,香港特區在憲制觀點上並非三權分立,只係司法獨立。

廣告

陳帆一而再地衝出嚟表演、失言、失態,已經成為官場新常態,好明顯係佢每次表演完畢,唔單止冇人敢批評,大家仲扮擦鞋仔直豎拇指表示局長好嘢,夠膽玩返班議員轉頭。

港英政務官出身的官員,肯定唔可能認同陳帆亂噏搞爛gag之作風,面對議員質詢,政務官寧願選擇「食帶」,無限loop原本準備好的line to take,至少唔會輕佻浮躁,毫無官員應有的品格,尤其比起前任張炳良不亢不卑,更顯出此等庸官之無能。

廣告

陳帆82年加入政府任職助理電子工程師,2009年出任機電工程署副署長,2011年升任署長,專業職系出身,最高去到屬首長D5級,D8常任秘書長都未做過,只因得林鄭提攜而晉升為運輸及房屋局局長。如此履歷,如果做出成績,至少有張炳良一半都好,𠵱家成個維園阿伯咁款,你問佢局內常秘服唔服?

去年陳帆上任在記者會多次被追問,作為專業職系機電工程師出身,如何說服公眾他能勝任運房局局長。有記者要他即場講出,現在市民輪候公屋需時多久、高鐵將於何時完成,佢全部唔識答,只係用語言偽術耍走人:「與其我用語言說服你,我是否勝任,我希望大家給時間,看看我們日後用行動證明,看看我們成績是否符合你的期望。」

好明顯𠵱家陳帆表現並不符合公眾期望,大半年下來冇反省改善,仲變本加厲,莫非真係有人撐腰就可以打橫行?狐假虎威,由口舌招尤之庸官處理房屋、運輸兩大瓣隨時爆大鑊的政策,本屆政府民望想改善都難,完全同議員有冇拉布有冇佔中,或者有冇港獨無關,實屬咎由自取。

陳帆現象標誌着特區政府管治水平,由上屆吳克儉level再後退了一大步。

刊於蘋果日報

 

發表意見