立場新聞 Stand News

集會上指搞港獨者可殺 湯家驊指或違法 何君堯:要求港獨時即係戰爭啦 在戰爭裡面殺敵人有乜問題?

2017/9/18 — 10:58

建制派立法會議員何君堯昨日在添馬公園舉行「革走戴耀廷吶喊大會」,期間屏山鄉委會主席曾樹和表示,搞港獨者要「殺」,何君堯亦在會後稱港獨者要令香港及祖國付出龐大代價,「唔殺咗佢做咩?」何君堯今日接受商台訪問時再指,「當你要求港獨時,即係戰爭啦,在戰爭裡面殺敵人有乜問題?」行政會議成員兼大律師湯家驊則指,何君堯可能觸犯兩條公安條例,最高刑罰是監禁兩年。

湯家驊表示,何君堯涉違犯兩條公安條例,包括第17(B),即在公眾聚集場合,引用辱駡言詞激化群眾情緒,擾亂公眾秩序,最高判囚12個月。另一條則為公安條例第26條,即鼓吹暴力殺人、傷害其他人身體,最高刑罰2年。他認為,觸犯前者機會較大,但近年不少集會都有觸犯,惟警方執法寬鬆,很少提出檢控。

他又奉勸所有人士不要用辱駡性言詞,而何君堯是律師,「請佢自重」。不過他又指,有時中國人的言語不準確,說人是賊未必等如指控對方偷竊,說殺人亦可能有兩個意思,「一係真正殺咗佢,用暴力;也可能係呢個人唔值得同情,要取締佢,令佢喪失地位」。「我作為旁觀者,傾向相信後者。」

廣告

對於其言論可能犯法,何君堯接受商台電話訪問時指,「咩都有機會,戴耀廷講嘢根本犯了法,三年多四年都未繩之於法」,「咁多嚴肅問題唔講,你轉移視線,(前中大學生會會長)周竪峰乜人哋媽媽,是否sex abuse,你有無講?」

他又指,自己是真情表達,「對錯嘅嘢,嫉惡如仇」,又對主持指不要斷章取義,「殺的意思是嫉惡如仇咁解,你估真係要殺人」,但其後在追問時又指,「就算殺人又如何啫?當你要求港獨時,即係戰爭啦,在戰爭裡面殺敵人有乜問題?」

廣告

對於戴耀廷指他的說法或超越道德底線,何君堯指,「一個無道德底線的人批評我,我認為我有,我有民情支持,不容抵賴。」

何君堯在節目中與商台主持有連番交鋒,以下為其中一段:

主持:當手指指向別人的時候,可否都審視一下自己先?

何:我周時會檢討自己,日省吾身三次,我周時做,但在大是大非之下,你同我講啲細微嘢,我覺得好多餘,好嗎?

你認為講港獨啱唔啱,宣揚港獨啱唔啱,是否學術自由?你道德底線在那裡?

主持:咁你講嗰個(殺)字啱唔啱?

何:多餘啦,你同我講嗰個字,我根本不屑答你嗰個問題,你答我先?問候人哋娘親啱唔啱,

主持:咁我答你唔啱,咁你講嗰個字啱唔啱?

何:我講個字都啱,殺豬殺狗。

主持:你係講緊嗰啲人,係搞緊港獨嗰啲人,係人喎,就算係貓狗都唔應該咁啦。

何:係呀,我覺得係應該係咁樣,你唔好同我講呢樣嘢,如果你真係認為係講最重要個件事情,我哋究竟是否需要我哋嘅大學生滿口粗口講呢啲嘢。

昨日在集會中,有嘉賓講我哋殺呀,意思是唔要愛佢、煞停佢,我係講無赦,OK?其後再訪問,猛問這個問題時,我咪同你講,就算殺人又如何啫,當你要求港獨時,即係戰爭啦,在戰爭裡面殺敵人有乜問題?

 

發表意見