立場新聞 Stand News

雨傘之後,再無希望?

2019/4/10 — 9:34

資料圖片:2014年雨傘運動旺角佔領區

資料圖片:2014年雨傘運動旺角佔領區

【文:廖康宇(英國劍橋大學社會學系博士生)】

佔中發起人、雨傘革命輿論領袖等九人昨日於西九龍裁判法院判罪,勾起無數港人 79 日的佔領回憶。近年多場由泛民發起的政治活動,包括最近反對《逃犯條例》修訂遊行,號召力大不如前,當中年青人對政治投入程度明顯冷卻。

雨傘之後,主流傳媒焦點大多集中於政治明星,忽略青年、學生等社運骨幹成員,對其他非泛民參加者(如人稱「美國隊長」的容偉業先生、港獨派支持者)亦無公道評價。年青人不再熱衷政治、向上流動無望,台灣學術界稱此現象為「又窮又厭世」(註一)。

廣告

為了解年青人看法,筆者於過去數月與多位雨傘革命參與者對談。本文節錄部份內容,希望以年青參與者角度反思雨傘革命後本港民主活動發展。(為保障受訪者私隱,文中名稱並非真實姓名)

✽ㅤ✽ㅤ✽

廣告

問:你依家諗返起雨傘有咩感覺?

J:我嗰時係好熱心,但宜家冇啦。好多人都唔知道佢哋去係為咗乜,係想要 CY 落台?定係爭取民主改革?

問:咁你依家睇返有冇後悔?

J:咁又冇,我覺得要出聲。香港係我屋企,我要為佢爭取。就算唔 work,起碼我都試過。香港人太忙,成世人淨係為咗搵錢。我哋上一代見證六四,佢哋知道(遊行)唔 work。我哋嗰陣去佔中因為我哋仲後生,我哋有夢想。去到我哋既下一代,共產黨越嚟越專橫,佢哋更加冇機會(爭取民主)。

問:你依家睇返覺得雨傘係成功定失敗?如果失敗邊個要負責?

J:我覺得係 Yes and No。佢有喚醒到啲人關心民主,但係就係咁多。好多人覺得同中共對抗係冇可能成功,但呢個唔係佢哋嘅錯。唔係有冇決心嘅問題,呢個係政治現實。

(Michelle, 浸會大學4年級學生, 港獨派)

✽ㅤ✽ㅤ✽

問:都成四五年前,你仲記唔記得雨傘嘅時候係點?

T:我嗰時喺現場望住所有嘢發生。我覺得都值得去做嘅,但係係失敗嘅,最終乜嘢都爭取唔到。

問:你覺得香港嘅民主發展仲有冇希望?

T:我又唔會話冇希望嘅。我覺得要保持樂觀囉,但係我哋又冇乜嘢做到。[…] 你睇吓 Trump Trump (美國總統川普)依家挑戰中共,可能第時會有啲改變。

(Tom,城邦論支持者)

✽ㅤ✽ㅤ✽

Y:我嗰時係係佔中秘書處度做義工支援被捕人士。雖然我係讀Social Policy(社會政策),但係雨傘係我第一次將呢啲Concept運用。

問:咁雨傘有冇改變到你嘅政治取態?

Y:我依家睇得好清楚。對於香港人民主呢兩個字其實佢哋都唔係好熟悉,我覺得好多人就算佢哋去佔中,都唔知道普選係乜嘢。佢哋佢好大程度係因為警察(用催淚彈對付學生)。

問:你點睇香港未來民主發展?

Y:冇㗎啦,我覺得冇希望,呢世人都冇希望。

(Yan,立法會議員助理,泛民支持者)

✽ㅤ✽ㅤ✽

問:經歷過雨傘之後,你覺得香港民主發展有冇希望?

O:冇!機會係零!話有嗰啲人都痴撚線!

(Owen,網台主持,港獨派)

✽ㅤ✽ㅤ✽

十一位受訪者中,不論在民主光譜中任何政治立場,同樣認為於香港民主發展再無希望。年青一代輾轉於網上平台集結,挑戰傳統泛民輿論領導者地位。如何了解、組織新一代政治力量,將會是各個派別政治領袖的共同課題。

本文原文(英文)刊登於國際網絡人權討論平台M3 Dialogue(註二)。M3 Dialogue 關注全球人權民主發展,討論內容包括新疆再教育營、伊斯蘭國婦女、伊朗人權發展等等,歡迎有興趣讀者關注,不惜賜教。

 

(註一)又窮又厭世:當代青年的情感政治與貧窮化問題
(註二)Is there‘Hope’ for Democracy in Hong Kong after the Umbrella Movement? 

發表意見