立場新聞 Stand News

青年發展委員會只係A貨

2018/3/29 — 18:21

青年發展委員會成員吳思諾、陳婉婷、盤翠瑩、霍啟剛、楊哲安等。

青年發展委員會成員吳思諾、陳婉婷、盤翠瑩、霍啟剛、楊哲安等。

林鄭之前喺特首選舉時,就開左好多空頭支票,就話會搞好青年政策,甚至會搞多啲渠道,畀後生仔參政論政。不過DQ左就係DQ左,無論搞幾多野,議會都唔畀人入架啦。

政府最近就升格左青年事務委員會,變左由政務司司長主持既青年發展委員會,話就話有8個局既局長都有份喺委員會入面,但成個委員會到底有冇政策制訂功能呢?

睇返委員會既五個職能:

廣告

(一)監督青年相關政策、策略和措施的檢討、制定和落實;

(二)督導及加強決策局、政府部門及其他持份者的協作,以推行與青年相關的政策、策略和措施;

廣告

(三)就青年工作推動跨界別協作,以及就青年發展事宜推動相關諮詢及法定組織的參與;

(四)推動青年參與及收集他們對與青年相關的政策、策略和措施的意見,其中包括舉辦行政長官青年高峰會;及

(五)按需要設立專責小組、工作小組及其他模式的附屬小組處理相關工作。

其實,都係以監督、督督為主,搵一班人返來就係睇實政府點做野,而唔係搵一班人一齊傾下點做野,又或者叫人拋橋出來,畀班官員一齊傾下做唔做得過。其實而家最大既青年政策問題,就係通常關於後生事既政策,都係由一班公務員主導,完全係一種長官意志既政策思維,冇乜真正去落地問人意見,之前搞青年宿舍個類野,又有幾多真係聽完後生既意見,再去做相關政策先?

睇返而家既委員會人選,其實都係一個派餅仔既遊戲,入面又有幾多人可以代表年輕人呢?

專業界別(11人,25%):

陳浩庭*、陳寶玲#、何力治&、何玉芬、劉詩韻、梁卓偉、李原曦、唐麗萍、Rizwan Ullah、葉沛霖、劉鳴煒*&

政黨、政團(7人,16%):

陳博智(民建聯)*&、林琳(民建聯)*&、梁宏正(經民聯,梁君彥個仔)&、吳思諾(民主黨)^、謝曉虹(深水埗社區聯會)*&、姚國威(工聯會)*&、楊哲安(自由黨)&

青年服務團體/青年團體(9人,20%):

鄭仲文(童軍總會)*、范凱傑(香港青少年領袖發展協會)*&、霍啟剛(香港青年聯會)*&、郭永亮(香港青年聯會)*&、梁毓偉(香港青年協進會)*&、馬德仁(香港傑出青年義工協會)*、蕭景威(香港紅十字會)*、竇一龍(香港青年聯會)*&、徐小龍(國際青年商會香港分會)*&

體育界、文化界(5人,11%):

陳婉婷、何卓彥、鄺勵齡、吳森雋#、余嫿

其他界別(3人,7%):

鄭康煥(學生)#&、盤翠瑩(前新聞界)、冼漢迪(商界)

官方委員(8人,18%):

政務司司長、商務及經濟發展局局長、教育局局長、食物及衞生局局長、民政事務局局長、創新及科技局局長、勞工及福利局局長、保安局局長、運輸及房屋局局長

*為上屆青年事務委員會委員
&具有建制背景或曾明確表態反佔中
# 自薦計劃入選

35個非官方委員當中,有15個曾明確佔中,或具有建制背景,佔當中43%,而來自民主派就得1個(3%)。咁樣既委任名單,好難叫人唔信呢個係分餅仔遊戲。以前既青年事務委員會已經畀人叫離地,就算係今日組成名單入面,有3個係自薦計劃既成員,但其實都唔代表委員會貼地左,反而只係做樣做到冇咁離地姐。

由80年代開始,公民社會一直都倡議緊全民選既青年議會,同時政府要分一部分既政策權力畀呢個議會,去制訂一部分既教育、青年、地區設施既政策。而家唔少既國家同地方,包括英國、新加坡、巴基斯坦等等,都已經有設立青年議會。而家搞個青年發展委員會出來,都只係做個A貨出來整色整水,繼續令政府做埋晒一堆堅離地既政策。(另看青年發展委員會新聞稿

 

作者 facebook

 

發表意見