立場新聞 Stand News

面對記者追問 CY上身的曾偉雄會咁答...

2016/5/4 — 18:21

四月三十日,警務處在警察總部為行將退休的警務處處長曾偉雄舉行告別儀式。 (資料圖片)

四月三十日,警務處在警察總部為行將退休的警務處處長曾偉雄舉行告別儀式。 (資料圖片)

前一哥曾偉雄同志退休前大大聲的說,不會從政、不會從商,只會做義工,一年不到,卻急不及待跑到財團當「顧問」了,一個星期返三日的工就有年薪百萬,記者追問下他卻否認違諾,說自己不是「從商」,「只做顧問」而已。

Well,well,well, 太有梁振英特色了,如果記者再追問,梁振英上身的曾偉雄會怎樣說?我來示範吧!

廣告

記:「曾生,走去財團工作,係唔係為咗搵真銀?」

曾:「我無『走去』財團,我係坐車去嘅。」

廣告

記:「咁你點解唔坐車去大學或者公營機構做顧問,偏偏坐車去財團做?」

曾:「請我當顧問,係財團自已嘅決定,唔係我決定嘅。」

記:「但係文件顯示,份工係你自已申請喎!」

曾:「申請文件係我個仔個阿媽個老公個細佬個阿哥填嘅,事前我並唔知情。」

記:「但係你唔係話會當義工咩?呢份工成百萬年薪喎!」

曾:「義工嘅意思係有意『義』嘅工作,唔係『義』務嘅工作,我覺得呢份新工好有意『義』。」

記:「但係你講好係做一蚊嘅義工喎!」

曾:「因為我嗰時係用廣東話講,而合約係用英文寫,所以大家誤會咗,我講嘅係一百萬蚊。」

記:「係商業機構工作唔係從商係咩?」

曾:「我只係去嗰度返工,至於嗰度從事咩工作,係由佢哋安排,唔係由我安排。」

記:「曾生,講來講去,咪又係為咗個錢一個字,你會唔會覺得自己無誠信?」

曾:「我為嘅,係『港幣』兩個字,唔係『錢』一個字,我唔記得我有講過我唔會從事非義務性工作,因此唔存在誠信問題,各位,我已經掌握証據,成件事其實係外國勢力配合本地港獨團體係背後炒作,陰謀推翻一國兩制,我會係適當時候向大家公佈有關詳情。」

 

原刊於作者 facebook;標題為編輯所擬

發表意見