立場新聞 Stand News

面對警察最重要嘅心法係:唔好怯。

2019/7/5 — 11:00

根據過往多次經驗,面對警察最重要嘅心法係:唔好怯。
警方會用一切方法令你 panic:包括早上凌晨未訓醒或者深夜訓著左敲你門、見面時即刻兇你扣你 48 小時、警館入面對你呼呼喝喝,拖延你所有基本要求……

但警察嘅本質就係欺善怕惡、盡力偷懶,並且係完全唔習慣面對認識法律或規章嘅人。你諗吓佢地平時對得最多嘅係咩?黑社會,或者街頭街角平民紛爭。幾可會搵到有人對住佢講英文或者講法律、講權力?

所以其實當你熟讀網上嘅法律知識,你已經係捷足先登,超出呢班警察平時面對嘅客戶群組。換言之,其實喺資訊戰上你係贏左:知己知彼,百戰百勝。你知佢地咩底細,但佢地唔知你識幾多。

廣告

所以必須必須緊記:第一次交鋒時,你係佔上風架。無必要 panic,無必要怯。要記住心法第一式:我無野講。佢問多幾問,諗住 chok 鬆你時,你可以將佢變成英文,或者換個方式講:法例賦予我保持緘默嘅權利。

尤其是講英文,一講英文啲散仔就會 hang 機。
所以一有意外,記住心入面大叫幾句:
唔好怯!我無野講!點都唔講!
唔好怯!我無野講!點都唔講!
唔好怯!我無野講!點都唔講!

廣告

至於佢係咪有十足證據先搵你,緊係唔係啦傻仔。我都打甩過一單,警察拉你告得你入佢地當然開心啦,但實際上最起碼都會忙你搞你一兩年,其實係好煩惱。所以你喺面對訴訟時已經會好煩惱,就唔洗咁早開始擔心啦。整理好心情,搵到律師幫忙,唔好自爆,處理好你嘅個人物品,就已經好足夠。

去到呢度,就要記住心法第二式:入唔入到罪唔係在於你有無做過,係在於佢可唔可以證明你有做過。

係在於佢可唔可以證明你有做過。
係在於佢可唔可以證明你有做過。
係在於佢可唔可以證明你有做過。

任何時候都唔好心虛,唔好怯,一冒冷汗佢就知你有野。你未被入罪時,你都係清白嘅,唔需要同佢地求饒或者嘗試喺佢地手上拎到任何益處。原因唔係佢地每一個都大奸大惡,而係佢地愈快處理到你,佢地就愈早收工。所有警察做野都係為私利,為個人便宜,同公義係隔個大西洋嘅距離。

俾警察拉過 N 次,喺差館最常聽到嘅對話係:「喂,師兄,呢度點搞?」佢地都係好鬼混亂架咋。唔好以為佢地係精密機動部隊,每個警員都有自己利益同 agenda,返工擦鞋比做野更重要,好多野都係靠估,或者跟 procedure 做啲唔做啲,成日就諗點蛇王。你面對嘅呢班人真係唔係你想像中咁強大。無錯,佢地有槍有炮,但只要你冷靜面對,好多場合佢都唔可以奈到你何。

各位手足保重。

(原文無題,題為編輯所擬)

發表意見