立場新聞 Stand News

食住先

2015/4/28 — 10:58

好記得我細個,有一次,返到屋企無嘢食,喊住咁口同亞媽講話肚餓無嘢食。阿媽就開咗包餅俾我食,同我講,叫我食住先。然後佢就即刻喺廚房煮麵,又切菜,又煎腸仔,又煎蛋,隻蛋仲要係農場蛋,好新鮮,好好味。好味過好多茶餐廳。

問題係,中共唔係你阿媽。而家佢明明屋企大把嘢食,但係佢就係驚你食咗佢副身家咁款,求其喺廁所開咗包臭丸,話係貢丸,叫你食住先。

究竟食唔食住先呢?

廣告

你可以話:「而家無得食,唔通唔食住先呀?而家食住臭丸先,食食吓就有鮑魚你食啦。」問題係:喂,你而家竟然連臭丸都敢食,對住包臭丸祈禱謝晒飯咁款,你估佢日後仲需要俾其他嘢你食咩? 要記住,宜家佢唔係無得食,俾住啲你食,而係求其敷衍你。你連臭丸都肯食,佢以後埋日日叫你食臭丸囉。你可以話:「而家唔食,連臭丸都無得你食。咁點解小強性格要咁屈強,唔肯食呢?」

唔食,唔係期望第日可以食好嘢。

廣告

唔食,係一種控訴,控訴佢竟然博晒懵俾臭丸我食。

唔食,係一種表態,係我唔認同你俾我食臭丸嘅做法。

唔食,係因爲知道,就算食咗都唔會好結果,反而俾人以爲佢真係好好人。

最重要係,唔食,係做第一個唔聽話嘅人,證明呢個世界唔係你玩哂。

食住先?你對住佢可以感恩謝飯到嘅,埋食囉。

 

原題為〈【因爲喺香港人嘅事,所以用廣東話寫】食住先〉;原刊於作者 facebook page

發表意見