立場新聞 Stand News

立法會選舉 首輪民調淺析

2016/7/14 — 23:56

民主動力委託港大民研,進行立法會選前民調。根據民調結果,民主黨勢危,只有兩區可穩勝,而青年新政游蕙禎、黃俊傑則可能掃走九龍西、新界西的最後一席。本土民主前線梁天琦,在新界則有一成的支持度排行第三,按民調可穩勝。香港電視主席王維基在港島區的民調中排行第三,按民調數字,同樣穩操勝劵。

民主動力委託港大民研,進行立法會選前民調。根據民調結果,民主黨勢危,只有兩區可穩勝,而青年新政游蕙禎、黃俊傑則可能掃走九龍西、新界西的最後一席。本土民主前線梁天琦,在新界則有一成的支持度排行第三,按民調可穩勝。香港電視主席王維基在港島區的民調中排行第三,按民調數字,同樣穩操勝劵。

立會選舉第一輪民調出爐。好多人表示失望。但睇返具體情況,我又唔覺得好差。首先,民調同真實選舉結果可以有好大差別,因為得閒聽電話做民調的人,應該有唔少師奶同老人家,所以民調結果通常只反映到「最得閒做民調的市民的選舉意向」,而未能完全反映民意。睇返歷次選舉,激進派的選票往往被民調低估,而部份溫和泛民高開低收亦屢見不鮮,所以大家無謂將首輪民調結果睇得太重要。更何況,民調本來就係影響選舉的因素之一,選民會因應民調結果去配票、去棄保,所以現階段排頭位的候選人,最終得票率好有可能會大幅降低。

好喇,至於今次民調結果,各大網媒好快已經做晒圖表,各大KOL亦開始寫文分析了,我地不妨睇下結果係咪真係咁差。首先睇建制同非建制的分佈。暫且假設個民調屬實,如圖中所見,建制響地區直選方面會得到14席(包括民建聯、自由黨、工聯會、新民黨、梁美芬同謝偉俊)。非建制方面,泛民的公民黨係大贏家,每區穩奪一席,而且好多都排頭,即係5席;民主黨有九東九西港島3席;工黨現任3席可以連任;社民連有長毛同村長2席;人力全軍覆沒;民協1席;新同盟1席,而眾志、列陣、傘兵、政治素人等全部慘成炮灰。但泛民加晒都會有15席。本土派方面,毓民九西1席、天琦新東1席、青政新西九西2席,加埋4席。如果計埋屬於溫和本土的毛范,就係6席。王維基同方國珊難以歸類,暫當係獨立。咁即係話,非建制(本土+泛民)VS保皇VS獨立的比例大概係19:14:2,即係非建制派比上屆仲多左1席。而建制派的直選議席明顯係減少左。如果用「保梁/反梁」來分的話,自由黨都要計埋落「反梁陣營」,咁「保梁陣營」的議席會仲少。

廣告

超區方面,響嚴重碎片化下,泛民竟然仲保到3席,不可謂不神奇。不過大家無謂高估鄺神的吸票力,我極度懷疑40歲以上人士究竟有幾多人識得佢。反而陳琬琛單憑公民黨三隻字就排到第五位,就知呢個民調入面公民黨係幾咁強勢。不過民調高不代表最後得票都多既,當年梁家傑民調比真實得票率高出幾乎10%,而黃毓民08年最初得3%支持,所以好多野都仲要放長雙眼睇既。

至於從本土派角度黎講,初步有4席,其實已經唔算差。熱普城方面當然係慘烈,得教主1席,黃洋達繼續同人社攬炒輸俾謝偉俊。陳雲、四眼、松泰的支持率更加係慘不忍睹。不過都係果句,激進派響民調往往輸蝕,真實選舉可以有好大上升空間既。不過我仍然係估計熱普城得毓民係穩陣,黃洋達機會一般,其他三區不存希望。新東天琦應該好穩陣,唔駛點擔心;青政兩席只屬邊緣,非常勉強,尤其是青政中人的論述能力唔夠強,一到選舉論壇好易就會被迎頭趕上。不過又咁睇,有危機感先係好事,之前新東補選天琦有六萬六千票,好多本土派就心雄,以為形勢大好,而家稍為調整下心理,認真度下選舉策略,其實未嘗唔係好事。

廣告

至於泛民,雖然今屆有好多人出選,一早成了攬炒之局,但首輪民調結果又唔係真係咁差喎。當然,呢個民調並未反映保皇配票同種票因素,而且新東都未計鄭家富復出對泛民的影響,所以非建制響五區拎到4區尾席呢個咁「理想」既結果,現實其實好難發生的。如果港島同新西尾席都落入建制手中,咁非建制(本土+泛民)VS保皇VS獨立的比例就會跌落去17:16:2了。

不過選舉提名期都未結束,一切言之尚早。接下來的選戰,大家拭目以待啦。

 

原題為〈首輪立會民調淺析〉;原刊於作者 facebook

發表意見