立場新聞 Stand News

香港人在德國協會 Hongkonger in Deutschland Verein,正式成立!

2019/10/18 — 14:10

Freiheit — männlich/weiblich, Jonathan Borofsky (Bild:Stegermatt)

Freiheit — männlich/weiblich, Jonathan Borofsky (Bild:Stegermatt)

九月二十日,七個香港人加上一個德國人,一齊聚首 Offenburg*,香港人在德國協會,正式成立!

而剛剛,我亦都同律師去咗公證處度,爲文件進行加簽,律師好快就會安排地方法院嘅登記手續,如無意外,呢個協會將會喺十一月內成爲一個德國嘅註冊協會 eingetragener Verein(e.V.)。

呢個,應該係第一個喺德國由香港人成立嘅註冊協會。

廣告

目標

到底我地成立呢個協會,有啲咩目標?

廣告

根據我地嘅會章,香港人在德國協會成立之後,會有以下嘅目標:

一,聯繫身在德國嘅香港人
二,為身在德國而又有需要嘅香港人提供幫助
三,關注香港及德國之間嘅政治同商貿關係
四,收集有關德國嘅資訊,整合之後,再提供畀身在德國嘅香港人

當行政上嘅手續搞掂好哂之後,就會歡迎所有認同德國《基本法》入面提倡嘅價值(包括自由,平等,民主,法治),而又居於德國嘅香港人,加入呢一個協會。

只係平台,唔係大台

香港嘅「流水革命」,能夠延續超過四個月,其中一個原因,就係「無大台」。

創立「香港人在德國協會」,可能有人會質疑,我咁樣做,係唔係想起「德國大台」?

我同其他創會會員,都絕對無咁嘅意思。創立協會,我只有一個目標,就係為喺德國嘅香港人提供一個平台,亦希望可以擔當一個 facilitator 嘅角色(真係搵唔到呢個字中文講法)。

呢邊嘅香港人,由於欠缺一個具有法定身份嘅代表,好多時候,好多嘢都無辦法做到。就係好簡單咁收集一啲有心人嘅資金,然後用嚟扣返搞活動嘅支出,都已經係一件令人非常頭痛嘅事,而聯絡唔同嘅德國組織或者媒體嘅時候,都無辦法唔以個人嘅名義去做。就用 G20 團隊三次德國登報嚟做例子,ViSdP 後面,唔應該用我一個人嘅名嚟頂,而係應該用「香港人」嘅名義嚟登!

運動無大台,係好事,但我記得六月局勢剛剛踏入惡化嘅螺旋之際,好多朋友都勞心勞力,希望自己都可以做到少少嘢,幫到香港。當時呢個去中心化嘅動員力,真係令到好多香港人都驚歎。

我明白,面對一個無情嘅政權,匿名對於好多人嚟講,係一個必要嘅自我保護措施,但係每次當一個行動完成之後,臨時建構嘅平台亦隨之消散,當又有一波行動出現嘅時候,要再聚集多一次五湖四海嘅有心人,實在係一個好艱鉅嘅工作。

喺呢個時刻,協會最重要嘅角色,就係整合所有人力物力,等喺呢邊嘅香港人,擁有一個平台,不但出師有名,更可以一齊合作,互相支持!

展望

協會依家仍然處於起始階段,想要做到理想入面嘅角色,仍有漫漫長路。我好希望,身處喺德國嘅香港人,可以連成一線,一齊幫手,喺德國建立一個屬於香港人嘅社區,喺需要嘅時候,都可以互相幫助,亦可以爲遙遠嘅家鄉出一分力!

接下來嘅工作,十分之多,我地依家已經開始搵緊啲有心人。如果你係一個喺德國定居嘅香港人,認同我地嘅理念,又希望可以幫手的話,歡迎你加入我地核心會員嘅團隊!緊接落嚟,我會提供一個聯絡方法,等大家都可以一齊參與建立在德港人社區嘅過程。當協會完成註冊,辦理好所有手續(包括銀行戶口,會員管理系統等等),可以開始招收會員,接受捐款嘅時候,就會再通知大家。希望大家密切留意!

能夠得到創會會員嘅支持,成爲協會嘅主席,我深感榮幸。喺呢度我要多謝各位有份參與籌組協會嘅朋友對我嘅信任同埋你地嘅付出。

我地會繼續努力,同全部香港人齊上齊落!

石賈墨 上

* 呢個Post,我唔知道應該配咩圖,但係講到 Offenburg,我就好想講佢嘅歷史,咁就唯有引用返之前我寫過嘅嘢啦:

張相背後嘅大型雕塑,叫做「Freiheit — männlich/weiblich」Freiheit 大家都識啦,自由咁解。呢個雕塑出自藝術家 Jonathan Borofsky 之手,係由一男一女互相嵌入,各高舉一隻手嘅人所組成,用嚟紀念 Offenburg 喺德國民主化運動入面所扮演嘅角色。

唔講你唔知,原來一八三零年,法國七月革命牽起咗歐洲民主化嘅浪潮,直接令到德國出現三月革命,而第一個革命宣言,就係喺 Offenburg 出現。當時喺 Offenburg 一間叫 Salmen 嘅餐廳入面同外面,圍繞咗超過八百人,提出一份叫《人民的要求》嘅宣言,總共有十三段,當中有好多描述都清楚講明人民所要求嘅權利,例如係言論自由,集會自由等等。而呢啲描述,部分更加成為咗德國基本法嘅基礎。

呢個雕塑,就係用嚟紀念當初振臂一呼,追求自由嘅嗰八百幾位先行者。時至今日,Offenburg 每隔兩年,都會喺 Salmen 外面舉辦「自由節」,去歌頌佢地嘅貢獻。

 

作者 Medium

發表意見