立場新聞 Stand News

「香港人對李嘉誠,有種複雜情意結」

2017/3/23 — 18:35

李嘉誠 (資料圖片)

李嘉誠 (資料圖片)

與高人午餐,講起李嘉誠。

「香港人對李嘉誠,有種複雜情意結。」高人淡淡道。

「點複雜法?地產霸權,賣樓啲積離晒離譜用料又差,樣樣賺到盡壟斷水電煤,有咩咁複雜?」我反問。

廣告

「但係無可否認,佢係好成功。」他頓了一頓。「白手興家,做膠花做到變首富,邊個唔想做李嘉誠?」

「係做李嘉誠個仔。」我苦笑了一下。

廣告

確實,從某種意義上說,李嘉誠是極度成功的,但難道這就等於他有錢賺盡、發財不立品的做法是正確?

「呢個就係複雜嘅地方。」

「你可以話佢有錢賺盡,後生仔可能唔鍾意呢啲手法,但係喺香港,在商言商就係真理。」「做生意唔係開善堂,在商言商到可以做到李嘉誠咁,就係成功。誇張啲講,李嘉誠就係香港曾經嘅「成功」,曾經風光歲月嘅象徵同圖騰,李嘉誠就係好多人口講獅子山精神嘅實際代表。」

「哈哈,咁使唔使多謝誠哥幫我哋守護香港價值咁多年?」我忍不住乾笑幾聲。

「起碼佢無去簽名反佔中,無捐錢俾七警,唔會好似大陸啲土豪富二代咁財大氣粗,係咪?」

如果硬要這樣比較的話,或許對吧。

「所以香港人期望李嘉誠,可以支持曾俊華,或者講,反對林鄭月娥做特首。」

一直傳聞誠哥等傳統富商集團,對中聯辦在港搞風搞雨相當反感,當各大富豪建制西瓜靠大邊全部倒向林鄭月娥,不少人期望誠哥可以表態撐薯片抗西環,想深一層還滿悲哀的。

「應該調轉講,如果香港有人可以頂住西環,呢個人只可以係李嘉誠。」高人續道。「呢個係好多薯粉嘅希望。」

終於入肉了,我心想。

「咁你覺得女媧係指邊個?」我問。誠哥女媧論一出,全城開始猜字謎,有人覺得女媧是女的,意指林鄭無疑,有人覺得女媧這個字謎只是用來騙騙中聯辦,實際是暗指自己撐薯片,各取所需莫衷一是。

「我留意嘅反而係香港GDP只佔中國2%,仲講到眼濕濕。」

即是誠哥都一樣風光不再?他支持不支持誰,已經不能左右大局?

「呀,原來誠哥已經唔係香港首富。」高人顧左右而言他。「過誠哥頭嘅呢,喺大陸搞速遞嘅。」

一片沉默中,智者電話響起,傳來短訊。

「我啲淘寶到咗趕住拎,你慢慢坐。」

看著高人遠去的背影,不知所故聯想起《樹大招風》的尾段,林家棟演的季炳雄在天台落寞的背影,和那首片尾曲。

「你似北風,吹走我夢,就讓一切隨風。」

 

作者 facebook;標題為編輯所擬。

發表意見