立場新聞 Stand News

香港人的「百五步」和「一百步」

2015/6/9 — 11:04

【文:琪琪】

最近某商場和日本企業舉辦的自製杯麵活動,吸引逾二百人排隊參與。由於人數眾多,有人等了個多小時仍未能購票製作杯麵,而主辦單位突然截隊結果引發現場巿民鼓噪不滿。

睇到呢段新聞,我當堂嚇左一跳,然後得啖笑。原來香港人為左自製個杯麵竟然可以咁瘋狂。

廣告

不過跟風有時就係香港人的生活寫照,亦係可悲的地方。傳媒報導有新開張的拉麵舖,就不惜一窩蜂排三個鐘頭隊去食碗拉麵(唔理係咪好食);搞個馬拉松,就一窩蜂去報名十公里甚至半全馬(唔理自己一年跑過幾次步);有間老店結束營業,就一窩蜂去影相懷緬(唔知自己係去懷緬些什麼)。但對於食物背後的故事、活動的意義、結業老店的故事,我們卻沒有甚麼興趣去放入記憶。

小妹比較唔受教,無聽大劉個公子話去慳錢。上個月我去日本橫濱旅行(利申:無樓無父幹),當地有間杯麵博物館,一樣自製杯麵,遊客不但可了解杯麵的歷史、文化、製作工序,更可以慢慢係博物館入面設計杯麵外觀,選擇湯粉味道/配料,包裝…除了令人增進知識外,博物館的氣氛充滿大人小朋友的歡笑,與香港同類活動的氣氛、深度相比,真係同一件貨,不一樣的結局。

廣告

其實當我地香港人批評強國同胞大鬧機場 / 在香港掃奶粉益力多 / 排隊打尖 / 四個人坐五個位 / 大陸教授罵香港人是狗的同時:

我地不亦曾為了免除信用卡公司逾期罰款而投訴客戶服務員 / 去日本韓國狂掃零食化妝品 / 在金鐘地鐵站打尖上車 / 搭巴士一人霸兩位/ 一有不如意就集體鼓噪,甚至人身攻擊指罵他人,香港人就從沒有做出疑似強國蝗蟲的行為嗎? 古語有云「五十步笑百步」,我們有無諗緊其實自己是百五步笑一百步?

我們有「文明」的証明我們是香港人不是中國人嗎?我們要自由社會,但同時有沒有尊重別人的自由空間?有人帶頭鼓噪欺凌,我們有沒有出面制止,抑或跟風做埋一份?當我們高舉「香港人」的價值時,我們也要做好自己,至少要做到己所不欲,勿施於人。

 

作者簡介:曾在四大會計師樓稅務部門打滾的小薯仔,見盡會計師為搵食做到隻狗的生活和難以為不公義發聲的無奈。

發表意見