立場新聞 Stand News

香港團結基金,我撐!

2015/6/17 — 15:30

【文:LJ】

董伯伯牽頭的「香港團結基金」廣告出街,坊間黃絲鬧爆,莊陳有跳船,哎呀,你哋如果睇得細心啲,其實就知道呢個廣告用心良苦。

廣告

先講呢個廣告嘅配樂,係殖民地時代嘅電視劇主題曲《奮鬥》,唔係回歸祖國後嘅《香港始終有你》,我就覺得有啲政治取向囉。

廣告

廣告片中其中有幾個鏡頭,影住一個攀山高手,爬過一幅藍色的高牆,係咪勉勵大家挑戰藍絲同高牆呢?

影片中另一個焦點,係一位賣雪糕的老伯伯,一個人好辛苦咁推一架好重嘅車,車上嘅招紙,係藍色嘅,再一次暗示,藍色係一種障礙,當一班建制派喺立法會否決全民退休保障,佢哋全部人都令呢位老伯伯百上加斤。

影片中影到五個小孩的校長呂麗紅,佢有一個大特寫鏡頭,身後嘅背景係一幅黃色嘅牆,咁又代表啲乜嘢呢?

當一個攞唔到最佳男主角的動作電影小丑大聲疾呼「根本沒有香港電影」之時,影片專登搵嚟獲得香港電影金像奬最佳女配角嘅陳麗雲女士,可以話掌摑咗呢位大哥一巴。

當然,不得不提廣告最後一個鏡頭,影到一名男子爬上險峰上,想點?係咪想掛「我要真普選」banner?

而最重要嘅係,Logo:曲到圓,所以,我一定撐呢個廣告。

講到底,董伯伯係政協全國委員會副主席,有好多說話不能夠太明明白白講出來,用影像拍出來,用一啲暗示,叫大家團結一致,迎難而上,我梗撐㗎!

即使董伯伯唔係咁諗,都要講到佢係咁諗,論budget,一般民間團體無班財主咁厚家底,而班財閥最鍾意站在道德高地大談「阿媽係女人」的大道理,再花百萬金元拍條溫溫吞吞、立場難判嘅廣告片,我唔「草船借箭」重對得住自己嘅?

 

廣告狂人 facebook

發表意見