立場新聞 Stand News

香港會計師公會盤數

2016/2/1 — 11:36

香港會計師公會年度報告 2015 封面(圖由作者提供)

香港會計師公會年度報告 2015 封面(圖由作者提供)

【文:小燕子@進步會師】

超然特首那句「多謝商界準時交稅」真係聽到火都嚟,香港市民好似比賊人打劫完,佢再同你講「多謝晒喎,下年我會再嚟」咁鬼嬲。本來交税係公民義務,但香港納稅人嘅錢就係養埋晒啲垃圾高官,低質素零票立法會議員,最離譜就係將香港人辛辛苦苦賺返嚟嘅錢唔係用嚟照顧港人,咩一帶一路就大嗱嗱攞十億供外人(尤其是內地)嚟香港讀書,點解香港學位唔係港人優先?唔係用於栽培土生土長嘅香港年輕人?咁仲交稅做咩?仲有幾個大白象工程不斷要香港人比錢填氹。寫呢篇稿時,港珠澳大橋又強行追加撥款54億,香港政府啲錢係咁陰乾,財政儲備唔知仲捱到幾耐。

言歸正傳,每年年尾,都係交會計師公會會費同CPD acknowledgement 嘅日子,你地交咗未呀?通常四大或大機構都會付還返會費,左手交右手,以往都無特別注意公會嘅事務。但早排收到會計師公會寄嚟嘅2015 Annual report。坦白講,我以前都唔會睇,financial statements 平時日日返工仲睇唔夠咩,但本report實在設計得太精美,加埋大大個title “The will to succeed”,令我忍唔住揭開嚟睇想succeed啲咩?成本report 差不多100頁,公會有咁多野要disclose?職業病加好奇心發作,心諗會計師公會乜咁重本,今年賺咗好多錢咩?啲錢又洗咗去邊?睇下先。。。

廣告

[請注意,以下所有數字係指institute]

首先揭去P&L。嘩!原來2015年度公會有$130,660,000會費收入。成億收入,咪同香港第一大黨民建聯差唔多?好犀利喎!但Comprehensive income (即net P&L) 約$1653萬,較2014嘅$2270萬大跌27%,少咗六佰萬。但再睇埋個breakdown,咦?點解2015 principal income (唔計other income,因為收入來源唔穩定)竟然係蝕咗五佰萬。無錯,噤咗好多次計數機,係loss of $5,028,000!腦內頓時十萬個為什麼,咁奇怪嘅?幾年前公會咪一炮過比成億幾cash 買胡忠大廈做寫字樓,無做按揭,即唔洗供樓又唔洗交租,公會仲有乜洗費要一年過億?平時嘅CPD event 多數要收費,要補貼咁多錢嘅咩?

廣告

原來大部分洗費用嚟出糧,“Note 18 Employee benefits” 指出原來2015公會人工係$118,683,000,佔收入90%。公會員工約190人,即平均每人年薪約$624,650或每月差不多$52,000,整體增幅比前年係5.15%,喺咁嘅環境下喺香港可以話好好pay。

睇埋“Note 19 Key management personnel remuneration” 仲眼火爆,Chief Executive and registrar (即同一個人), 年薪竟然係$5,107,000,當中包括$782,000 performance bonus,成個package 比2014年度增加6.2%?salary 増長6.6%,B仔增幅3.7%。What?呢個post月薪約$424,580,睇到呢個數,我當堂呆咗!仲高過司長、局長級官員。一般商業機構,做得唔好當然cut人工、cut[L1]  B仔,尤其是今年個市咁差,你睇下投資銀行炒幾多人?你有減人工嗎?你有B仔出嗎?或者保得住份工已偷笑。

會計師公會全港得一個,我唔知點樣做benchmark, 上網search下啲新聞及其他機構嘅資料比大家參考下。大家記唔記得早排新聞話醫管局行政總裁梁栢賢下年度年薪增加到$529萬,增幅近5%,公立醫院醫護人員就無乜點加,所以有醫生靜坐抗議呢種「肥上瘦下」嘅政策。香港醫學會及香港律師會最近期嘅年報只係披露所有council members 係無支薪,同會計師公會council members 一樣。但呢兩個機構似乎沒有chief executive 呢個職位。另外,金管局總裁陳德霖,2014年度固定薪酬為612.5萬,浮動薪酬260萬加其他福利,總數為993萬。

仲有,“Note 16 Surplus before tax”指出,2014年度exchange loss 蝕咗$866,000,主要係四千幾萬現金係人民幣,人民幣跌咪蝕囉,有啲又放喺定期存款未能及時換返港幣。2015年recorded exchange loss 只係6萬左右,睇落好似好少啫,咪住,睇埋“Note 21d Foreign currency risk” 同埋 “Note 25 Event after reporting period”,因為人民幣持續下跌,公會做嘅人民幣定期到期會蝕exchange loss $1,308,000,下年度先入帪。睇到呢度,我真係想問下公會嘅CFO 同risk management 攪咩?無汲取教訓咩?

我明白會計師公會成立嘅目的唔係賺錢,唔可以用上市公司嘅標準來評價公會嘅表現,但運作成咁,會員嘅錢係咪用得其所,定係有錢用盡?你地話呢?

 

 

發表意見