立場新聞 Stand News

香港禁武,拳套都唔畀賣

2019/9/5 — 21:43

作者提供

作者提供

今日跟大家分享一件趣事。話說本人有練吓武,近大半年跟朋友玩吓Boxing,覺得幾好玩,於是喺上個月八日,我去Decathlon(迪卡儂)買咗呢對拳套。

唔知大家有冇聽過Decathlon,係一間好大的運動用品鋪頭,在銅鑼灣、將軍澳和旺角雅蘭地庫都有。我呢對就喺雅蘭買嘅。

咁昨天,其他一齊玩嘅朋友諗住去買返啲拳套、拳靶、阻力帶等等嚟操fit吓自己,於是就去返雅蘭入貨。

廣告

點知,乜都冇,拳套拳靶冇,連阻力帶都冇。

咁你梗係以為,自從721之後,香港喺有少少「武風」萌芽,好多人都拍片或喺傳媒教人一啲防身術,所以啲嘢咪賣鬼晒囉。

廣告

有啲嘢係無法用正路去諗——朋友問個店員點解乜都冇,店員非常無奈表示:

「因為大陸唔批貨落嚟,我哋亦都唔知幾時先批,所有分店都冇得賣了。」

嘩哈哈,做咩呀依家?你覺得香港人真係全民勇武,個個練武去抵抗,要禁武呀?大佬呀,你係連阻力帶都唔批貨落嚟賣,攞嚟健身架咋喎?真係出去勇武抗爭,唔通帶對拳套喺身咩?冇拳套拳靶係咪又練唔到拳健唔到身?唔係囉。

唔夠一個月前我去買,所有嘢都大把貨,排我前面嗰個都係買拳套,點知依家內都唔批落嚟,究竟真係驚成咁,定係有啲人擦鞋揣摸上意胡作非為呀?好似過關查遊行相單嘢,好多人都懷疑係中央政策定係有啲人自行揣摸嘅意思。

依家真係好似返去武禁嘅時代,仲話弘揚武術,吹捧葉問,晒氣啦,練都唔畀你練,要你全民做返「東亞病夫」。

呢單咁有趣嘅嘢,記者有興趣不如去跟跟佢?

作者facebook

發表意見