立場新聞 Stand News

香港進入咗以言入罪搞針對嘅時代

2017/5/9 — 13:01

5月8日晚上,聲援 Hidden Agenda 人士製作的 banner,上面寫著:釋放現場音樂

5月8日晚上,聲援 Hidden Agenda 人士製作的 banner,上面寫著:釋放現場音樂

成日話自己好守法,乜嘢都唔諗開口埋口話「總之違法就係違法」嘅人,我好懷疑佢地其實有冇真係睇過啲法律條文。

好多人都未必知道,《公眾娛樂場所條例》裡面(下圖)係寫:任何人未經發牌都唔准進行娛樂活動,而所謂「娛樂活動」嘅定義可以係無遠弗屆,包括任何音樂會、放映、劇場、馬戲、展覽、比賽、賣物會、跳舞派對。估你唔到嘅係「講座」都叫娛樂,就連講故仔都要發牌申請先准講。

廣告

如果上述活動每次都要申請發牌,即係我每講一場talk,都要向政府申請等佢唔知幾多日先批,唔係即拉,我理解基本上即係代表政府要全面管制香港民間所有文化活動的形式與內容,亦等同於同文化界知識界宣佈戰爭狀態。

條例承襲咗港英啲「善治」高明嘢,識得拎啲冠冕堂皇嘅技術理由做藉口,會話點解娛樂都要管,一般目的係因社關注「消防安全」及「引起混亂」。但你諗吓,我同一班人講故仔你話我違反消防,我唔講故仔,同樣一大班人坐哂喺度,突然就冇違反消防條例? make 唔make sense? 依家嘅音樂會有幾引起混亂,要出動哂入境警察當犯咁拉?

廣告

香港有唔少呢類限制市民生活自由嘅「殖民地惡法」,戰後同六七暴動後成立,以前用黎規管左派學校同政治社會活動,港英大部分時間存而不用。回歸後將法例保存過黎,估唔到(?)依家就天天都用黎打壓民間團體,比殖民地更殖民。

自從一個月前香港民間學院 Intercommon Institute 被教育局警告違規辦學個陣,我已經覺得香港進入左以言入罪攪針對嘅時代,政府向睇唔順眼嘅各種文化活動全面開戰,只係冇人鐘意咁講到明白揭開法例背後嘅陰暗面。同埋呢場好可能係一場比較緩慢嘅戰役,可能涉及到要用3-5年到10年嘅文化清洗,玩殘香港最保貴嘅民間及文化創造力,令到香港白白淨淨得番經濟功能,在政府全面監控下繼續「馬照跑舞照跳」。然後政府就繼續推動創意產業,拎哂啲地分俾自己友。

HIDDEN AGENDA音樂會都咁高調拉人封艇,如果大家都讀唔到政府發俾大家嘅訊息,認為冇咩嘢人地違法啫唔駛大驚小怪,咁真係豎我直言,地獄裏最熾熱之處,就係留俾在出現重大道德危機時保持中立嘅人,只不過地獄之火,第一個燒親嘅通常唔係佢地先咁解。

到到香港連文青小市集都冇得俾你行,出街發表句嘢都俾人拉冇拎牌講故仔,咁後悔都太遲。

 

(標題為編輯所擬;原刊於作者 facebook

發表意見