立場新聞 Stand News

香港首席政客曾俊華

2017/2/12 — 13:00

曾俊華

曾俊華

自曾俊華辭任財爺至近日發表參選政網,綜觀期間言行,Loser為香港感到驕傲,香港終於出到一位具水平嘅政客,唔似有啲政棍,只係識睜眉凸眼,惡形惡相,以肢體衝撞去吸引媒體眼球咁低層次,又或一味靠衝搞破壞班𡃁仔可比擬。

要成為政客,首要條件係懂得籠絡民心,識得做表面功夫,大家睇睇,鬍鬚曾經常笑騎騎,講嘢不愠不火,扮晒成個卡通人物咁,你話有幾大親切感;特別一般群眾,流於表面,鍾意你個人時,就覺得你做乜都好,縱然鬍鬚曾做財爺時毫無建樹,幾咁hea同幾縮骨都好,群眾都覺得冇問題,事關佢好似係陪伴大家成長嘅唐老鴨或米老鼠,即使做唔到嘢,大家對住個咁nice嘅薯片叔叔,又點罵得落口吖。

見風駛裡識轉彎

廣告

討好群眾,見風駛裡,簡單講係要識投群眾所好,你睇佢政綱提到香港市民最關心嘅房屋問題時,佢話可以做到六成市民以公營房屋作居所,基層市民聽到梗係好高興,好多輪候人士等咁多年都冇得上樓,過去咁多任特首都解決唔到嘅問題,鬍鬚曾一上場就搞掂,你話幾啱聽。

仲有呀,曾俊華反應超快,識得「兜」,好似話要六成市民可住公營房屋呢件事,經媒體廣泛報道後,有人質疑可行性,佢知衰喇,二話不說就話係長遠目標。又好似早前佢話要「休養生息」,嘩!香港俾好多地方迎頭趕上,你仲話要抖,於是有人批評,鬍鬚曾又馬上「兜」,話係針對政治上喎,你話佢幾醒。

廣告

忽悠功夫上乘

要做一位出色政客,最緊要識忽悠群眾,呢方面鬍鬚曾暫時喺香港政壇都無人能敵。葉劉批評佢hea做,佢就答做司長可以hea到十年都幾天才,又話葉太做佢上司時,俾嘅評級係好高;你問佢打唔打得,佢淨係話我都好打得,但就永冇去講講做財爺時,有乜功績或解決過過乜嘢重大棘手問題,更加冇舉出數據去證明自己點掂。事實上佢根本冇回答個問題,就將傳媒支吾過去。

好喇,你問佢身體健康,佢冇透露自己實際狀況,只係話你同我打打就知,聽落好風趣,實際好定唔好,最終都冇答,你話幾高招。

希望曾俊華可以勝出,香港經過董建華的商人治港,曾蔭權的官員治港,以及梁振英嘅黨員(好多人傳佢係共產黨)治港,真想睇睇政客治港會點樣。

 

發表意見