立場新聞 Stand News

骨灰安置同婚外情有咩關係? 邵家輝議員親身示範 ...

2017/5/25 — 15:35

有建制派議員話泛民將議案與同性婚姻扯上關係,係「風馬牛不相及」,不如今日又聽吓批發及零售界自由黨邵家輝議員親身演繹,如何講骨灰安置會講到婚外情!

立法會今天繼續審議和表決《私營骨灰龕安置所條例》,議員邵家輝長達 15 分鐘的發言,可謂無所不包、無奇不有。他一開頭嘗試回應議員提出的修正案,要求將「親屬」及「相關人士」的定義中,加入海外結婚或民事結合的同性伴侶。他說自己有好多同性戀朋友,甚至親屬都有人是性小眾,但認為「同性戀嘅身份係咪可以提升到同家屬一樣,作為立法會議員,我哋應該要認真諗清楚」。

邵家輝隨後繼續發表個人對於同性戀的各種看法,指香港這般開放社會,成年人應該有自己的選擇,正如自己亦很尊重出櫃的同事陳志全。然而,他提到不少支持一夫一妻制的宗教團體表示擔心,擔心不知道如何教授小孩。正正就在這時候,話題由同性戀急轉直入一夫一妻制,他問道:「香港市民應該支持繼續一夫一妻制嘅傳統定係覺得無所謂?」

廣告

世界級遊花園旅程未完,邵家輝再引述衞生署報告,指香港有 8,600 多名愛滋病帶菌者,說 1984 至 2017 年間數字持續上升,尤其是男男性關係的帶菌者增幅明顯。聽到呢度,主席梁君彥終於忍唔住出聲。

梁君彥:「邵家輝議員,你讀呢啲數字,同呢個辯論有咩關係呢?」
邵家輝:「同性婚姻伴侶引申出嚟來,有啲人覺得完全無影響,但我覺得...」
梁君彥:「呀...我哋而家係講緊骨灰安置修定...」
(眾議員笑)

廣告

梁君彥溫馨提示之後,邵家輝似乎都未有返正題的意圖,繼續讀出男男性關係愛滋病帶菌者的數字。陳志全議員都企起身,話:「同性戀感染愛滋數字同今次條例修定,係間接關係都聽唔到」。

邵家輝遂不談同性戀,轉而改論一夫一妻制,說:

「頭先唔同議員好似劉小麗議員都話,你哋咁尊重一夫一妻制,出面婚外情嗰啲更加唔能夠容許啦,尤其係好興嗰啲辦公室政治。呀,sorry,辦公室入面啲同事好多呢啲情況。即係立法會,我哋都有好多同事係度,有次我同太太講起,陳淑莊同劉小麗都幾靚㗎喎,佢黑曬面。我終於明白點解喇,佢擔心我係立法會裡面,有啲辦公室嘅婚外情。」

講到呢度,連食物及衛生局局長高永文都皺眉又黑面。邵家輝繼續一夫一妻制的講話,講足 14 分 44 秒,終於完成發言,但講到底其實骨灰安置同婚外情有咩關係呢?

發表意見