立場新聞 Stand News

律政司再控22人藐視法庭 黃之鋒轟浪費法庭時間

2015/1/8 — 12:42

去年11月旺角清場行動中,多人涉違禁令而被捕。其中第二批、涉及32名被捕者的案件,今早在高等法院進行聆訊。律政司已向法庭申請許可,控告其中22人刑事藐視法庭。

被拘捕的學民思潮召集人黃之鋒、人民力量快必譚得志和社民連黃浩銘今早到庭應訊,社民連的梁國雄也有到庭聲援。他們在庭外舉起黃傘,大喊「雨傘運動不屈不撓,梁振英下台」等口號。

廣告

黃之鋒在庭上表示,政府利用預約拘捕和法庭程序,意圖令雨傘運動的參與者疲於奔命。而現在律政司基於「一罪不能兩檢」原則,撤回他另一項「阻礙公職人員執行職務罪」,反映律政司理虧,又浪費法官寶貴的時間,他指律政司處理案件拖泥帶水,希望律政司「檢討一下」。

今早十一時許,黃之鋒在個人 facebook 專頁,以〈人在庭上〉為題,刊出自己的發言全文,強調律政司不懂時間管理、又要求部份被捕者「On-Call 24小時」。最後,他說「由頭都尾律政司,明知『一罪兩檢』唔合規矩,仲要強行用一罪兩檢招呼示威者,衰咗又要死死地氣收回『一罪兩檢』,咁依家係邊個唔尊重法治,相信大家心知肚明」:

廣告

今日律政司收回「阻礙公職人員執行職務」
順應示威者在上回法庭的訴求
願意收回「一罪兩檢」
只是反映律政司根本理虧
作為香港政府嘅法律機關
有咩理由唔知道
自己唔能夠一條罪用兩條法例去檢控?


講到尾
就係因為政府想進行政治檢控
只不過想以法庭打壓示威者
加控越多罪就越好
從而令到雨傘運動嘅戰友
在2015年只能夠在警署和法庭游走
難以繼續在街頭同埋前線抗爭


好老實講
律政司你要告就告 要判就判
唔好喺度浪費大家嘅時間
每次上泥高等法院
又唔係審案 又唔係盤問 又唔係查證
就係等律政司喺度拖泥帶水
搞泥搞去仲決定唔到係咪告兩條罪
拖咗咁耐都唔知係咪告曬三十幾人


法官閣下 時間如此寶貴
身負重任 各項要職
就要為咗應付律政司不合理嘅檢控
就要上泥坐 坐幾個鐘講幾句就走
真係完全無謂 更加係浪費咗納稅人公堂


最後想講律政司Time management
即係時間管理嘅問題
琴日無啦啦喺下午五點收到電話
警察叫我七點立即去警察總部
無啦啦拎份律政司document
講話要用泥今日上法庭用
但原來無份文件都上得庭
咁即係點呢?


依家律政司當我哋班人Oncall24小時?
你一打電話就要我哋喺兩個鐘內
由身處嘅哋方去到灣仔嘅警察總部
我哋唔係隨傳隨到 奉旨一定要泥搵你
唔該律政司有返最基本keep time嘅意識
作為政府機關 應該有返基本嘅效率
明知今日有三十幾人上court
就唔好昨日夜晚先交文件比我哋


由頭都尾律政司
明知「一罪兩檢」唔合規矩
仲要強行用一罪兩檢招呼示威者
衰咗又要死死地氣收回「一罪兩檢」
咁依家係邊個唔尊重法治
相信大家心知肚明

發表意見