立場新聞 Stand News

黃之鋒褸都未除得切就訓到暈左?

2016/4/25 — 10:14

圖片由作者提供

圖片由作者提供

【文:Anna Cheung】

考慮咗一日,點都要寫幾句。首先,喺紐約做咗「民主妹仔」廿幾年嘅我絕對係和理非(「單非」,因為喺適當時,我都會X人) 。1997年,生完個女坐緊月就同民主黨搞海外訪問。今次,就同手術醫生講提早開刀做手術,事關有位朋友四月中到訪!

絕對明白巴打對之鋒嘅批評,因為我都承認佢係有抵X嘅地方。事實係,之鋒嚟到紐約唔係嘆世界,係住我屋企地牢。我哋冇請佢食過乜嘢米芝蓮。為咗接受訪問,瞓得三四個鐘,趕喉趕命買幾個唐人街麵包同杯咖啡俾佢頂肚(連富豪們睇唔起嘅雲吞麵都冇囉)。之後三日夾埋瞓十個鐘,要走幾間大學演講,真係攰到PK㗎。(我一個做完手術冇耐嘅老人家都係瞓多佢幾個鐘,你話我會唔會帶條𡃁仔去遊山玩水咁痴線吖?)

廣告


至於搞活動,我哋同其他城市一樣,都盡力而為。唔係淨係為咗之鋒,而係有好多人希望想見吓佢(特別係返唔到大陸嗰D民運人士)。聽聞某義工有D嬲嬲豬,之不過每個城市嘅義工閒閒哋十幾廿個,我唔信佢會記得晒我地其他義工D名然後逐個多謝!想當年,我以前幫李柱銘,見第六七次我都要重新介紹自己,嗰心係有D嗱嗱哋㗎喇,咁又點?(有D人就真係好忙㗎嘛,只要唔係故意冷落我哋就得啦,咪睇在佢年中幫咁多人打免費官司囉!)

高登評論有幾真確?之鋒喺哥倫比亞同紐約大學有少少聲音,但喺耶魯根本就冇俾人挑釁,絕對唔係好似某D(唔知有冇在場嘅)網民講成咁。佢有冇展示佢自己D相,有,不過唔係十幾張。人哋大學有規限唔俾錄影,你要我播番全條片係冇可能。公道自在人心。喺度講幾句,就係過得自己,過得人哋!

大家對之鋒或者香港眾志有任何不滿都冇問題,各有自由表達,但只希望討論最起碼係建基於事實。

P.S. 褸都未除得切就訓到暈左?

( 文章標題為編輯所擬 )

廣告

發表意見