立場新聞 Stand News

黎明的啟示 — 政客公關之道

2016/5/9 — 7:27

左圖為黎明facebook片段截圖;圖右為資料圖片

左圖為黎明facebook片段截圖;圖右為資料圖片

上星期社交媒體全面被黎明攻陷,日日有金句,晚晚直擊核心外圍人群聚集聽演唱會實況,想唔到自雨傘運動後成功重佔添馬公園,竟然係一大班Leon fans。黎明將取消演唱會的災難,扭轉為最終全民參與的盛事,大家早已討論過,但當中除了捧黎明貶689外,成件事有甚麼值得思考地方呢?

首先黎明同政客最大分別,係佢有一大班忠心歌迷,無論黎明做任何決定,都會瞓身支持,而當黎明真誠道歉後,大家亦唔會同佢計較。政客同群眾關係就疏離得多,如果仲係寸嘴秒秒鐘挑機,窒人唔使本,乜都自己啱晒,有事又何來真正群眾支持?在網上見到好多人感慨地表白,終於可以堂堂正正認做Leon fans,因為黎明得到讚賞,支持者同感光榮,唔會再比人奚落貪佢靚仔硂儍更更。政客以為只要表現出詞鋒犀利,寸步不讓,以大道理訓人,就有群眾支持,殊不知公眾觀感並非咁簡單,今時今日更重視係品格、真性情,還原基本步。當689品德受公眾質疑時,越表演自己辯才就越乞人憎,邊個仲會認自己係佢支持者?

黎明比政客聰明是懂得直接利用社交媒體同群眾交流,政客當然知道今天社交媒體佔主流,但由於怕犯錯,於是抱着人有我有心態,將一些老土不堪由日薪一萬公關大員拍攝的官方活動照片,擺上面書就當做搞新媒體,結果最後變成嬲爆。黎明早在演唱會開始前已不斷用社交媒體發片,玩嘢,到宣佈取消當晚,用facebook直播,在演唱會舉行時,又用facebook直播功能同核心外圍支持者交流。黎明fans以中年男女居多,足證社交媒體並非年輕人專利,而是真正已佔據主流。去到呢一步,大家見到黎明唔係因為好彩而逆轉形勢,而689即使再做多十次行李門事件回應,一樣係被人圍插。

廣告

共產黨及其在港勢力一直以為只要控制主流媒體,就可以壓制反對聲音,提振政府民望,宣傳愛國主義。但幾年下來,由北京到特區政府、特首的支持度均全線大跌,出現了一個十分弔詭的情況,傳媒越歸邊受政權控制,公信力就越低,影響力大跌,年輕一代就更快速離棄傳統媒體,投向新媒體。

而一旦以新媒體為資訊來源及交流地方,傳統官方的宣傳變成了笑片,呢邊一出,那一邊立即改圖,群插,一路傳播開去。靠新聞稿及主流傳媒人脈關係所構成的利益網其實已經冇作用,即使將《明報》改成《文匯》,《南早》改成《大公》,天天將689競選宣傳活動當新聞放頭版,後果只會是《明報》大跌紙,直至執笠,對689民望全無效益可言,而社會中間溫和聲音消失得更快。

廣告

黎明今次逆轉災難啟示係唔使再靠舊一套娛圈公關手段去處理危機,而是直接面對群眾,走入群眾,搞一場群眾有份參與的運動,當捲入的群眾越多,聲勢浩大,其他批評聲音就會退到一旁。689當然冇咁嘅智慧去理解,即使知道點做,亦都冇可能做得到,因為一個自以為是、永遠正確的人,如何能真正走入群眾,承受被批評風險呢?

刊於蘋果日報

發表意見