立場新聞 Stand News

點解有D中國人移咗民至特別擁黨愛國?

2016/10/21 — 18:49

圖片來源:網上圖片

圖片來源:網上圖片

點解有D中國人移咗民至特別擁黨愛國?

愛國唔怕遲,最怕無人知。
同志被人玩,僑胞變MyDear。
擁黨揾著數,撐共可收Cash。
已非籠中鱉,何妨扮齊夷。

中國人就是這樣,留喺國內嘅時候,被政府玩,被強權壓。連政治自由、言論自由都受到限制。因此千方百計要走,要移民海外,要追求更好嘅生活。其實這一種取態不難理解,也無可厚非。

廣告

去到海外生活,當然可以繼續愛護中國。正所謂「落紅不是無情物,化作春泥更護花」。就算攞咗外國護照,成為外國嘅國民,都可以繼續以中國人這個血緣身份,關心中國及中國人的社會。會唔會咁做,係個人選擇,無人有權說三道四。

真正愛國,照計應該想國家好。要走,正正因為國家唔夠好,唔係使乜走?去到海外,享受外地嘅言論自由及民主制度,係唔係應該希望啲好嘅嘢,將來喺國內嘅同胞都應該有機會可以享受到?

廣告

不過,好多人走咗之後,又會變得十分擁黨。甚至係盲目擁黨,繼續為呢個政權打邊鼓,呢類人有D令人失望,有D甚至令人齒冷。

有部份海外僑民,去到外國生活,因為民族自卑感,郁D就覺得人哋歧視。對佢哋呢類華僑嚟講,一個越來越財大氣粗、越來越大聲嘅中國,自然係一種心靈上嘅補償。因此,支持現今共產黨這個政權可以在心靈上得到點慰籍。

而且在外國愛國愛中共政權再冇乜代價,唔使驚俾人㯚去問三問四,唔使驚俾D城管公安幹部及強力部門迫害。「廉價愛國」變成「最冇成本嘅投資」,又或者可以變成「最高回報嘅投機」,唔盡快入市就笨。

至於共產黨在國內點樣打壓人權、貪贓枉法、作奸犯科,重關佢哋咩事?而且,只要捫著良心,隻眼開隻眼閉,就算發唔到國民苦難財,點都可以多多少少撈番D國家富強小着數。中共政權在海外移民接收國(美加英澳)大搞$99(當地貨幣)僑胞回國觀光團,自己飛返大陸後由政府包食包住包交通大吃大喝豪玩兩個星期,幾抵呀,梗係乜都睇唔到乜都唔知啦。返到去海外安樂窩,將來有需要咪報效國家囉。呢啲著數,真係雞髀打人牙骹軟。

一般人尚且如此,有商業利益的、愛國有錢收的、參加愛國活動當打份工或者兼份 part-time 的,就更是可想而知了。至於高幹子弟、富二代、官二代及其他一啲有特殊關係嘅人士,就更加唔使講啦。最乞人憎嘅,就係嗰啲一方面享受外邊嘅民主自由,另一方面做高唱中國現在嘅體制係最好。呢啲人,其實應該捉哂番大陸俾強力部門修理一下。呢啲人,自己甩咗身,重要講風涼話?

當然唔係所有僑胞都係咁,不過好似我所講嘅呢一類人,又確實係為數不少。

唉,中國人民族性𥚃面,往往就係缺乏嗰一種超越吃飯拉矢購物搵着數自己發財嘅凌駕性社會倫理。日日掛喺咀邊嘅所謂「家國情懷」,其實對當權者及其鷹犬就係打壓異己、迫害少數嘅家國情懷。對於一般人民群眾,就係對同胞嘅苦難及不幸袖手旁觀,甚至為當權者打邊鼓搖國旗唱國歌希望搵翻少少著數嘅家國情懷。

作者facebook專頁

發表意見