立場新聞 Stand News

點解立法會必須要有得拉布

2017/12/14 — 12:38

2017年12月13日立法會外反對議事規則修訂集會

2017年12月13日立法會外反對議事規則修訂集會

遠嘅我唔講,我講醫委會改革。

舊年,騮哥、長毛、慢必等人合力拉布,將政府嘅「偽改革」拉倒。於是今年,政府提出嘅新方案終於加入大家要求嘅「獨立偵訊委員會」。方案距離理想仲好遠,但起碼,將來負責審理醫務投訴嘅人手,就會由本來30幾人大幅增加到200人。大幅增加效率,又有高度公眾參與,從此再冇所謂醫醫相衛。

我夠膽講,如果舊年冇拉布,就算俾多30年政府都唔會肯妥協,嘔呢個比較進步嘅方案出嚟。到時搞完一場大龍鳳,條Bill過咗,但問題無解決到,仍然會不停產生好似「張崇德個案」呢啲咁嘅慘劇出嚟。

廣告

呢個就係立法會「有得拉布」嘅重要性。

正如毛哥响今年七月嘅一場公聽會話齋,見到宜家呢個新方案,就證明舊年拉布係啱嘅。「就算你話我舊年拉布係罪該萬死,我再死多一萬次都抵」。

廣告

議會失衡加上威權政治底下,拉布幾乎係公民保護自己、爭取公義、推動社會進步嘅唯一手段。而健全嘅議事規則,就係呢一種手段存在嘅先決條件。

事實上「有得拉布」同「冇得拉布」,已經係現今立法會「幾乎失效」同「完全失效」之間剩下唯一嘅分界線 。一旦俾建制派成功強姦議事規則,本來奄奄一息嘅立法會,就可以正式RIP鳥。

#其實冇人鍾意拉布㗎
#你估幫班議員上拉布雞精班準備notes逐個政黨去做lobbying日日去煲底靜座唔攰㗎咩
#但拉布係從來都係必要之惡

 

發表意見