立場新聞 Stand News

𠝹票

2017/2/27 — 15:38

胡國興

胡國興

【文:余未】

特首選舉,曾俊華率先報名,有評論指係藉此保送胡國興入閘。是耶非耶,只有當事人自知道,但係坊間依然有不少聲音話胡國興入閘會做成「𠝹票」,甚至聽聞有民主派選委都係咁講。我當堂嚇一跳,然後得啖笑,講得出咁嘅言論嘅人,可能連特首選舉係點玩都唔多清楚。

《行政長官選舉條例》講得好清楚,特首選舉如果有超過過兩個候選人嘅話,搬完票通常都只會有兩個情況:

廣告

一.其中一個候選人得票超過六百票,當選;或者

二.咁多個候選人冇一個得票過六百,咁就篩走晒頭兩個得票最多候選人以外嘅參加者,等兩條友私片,分出高下。(註)

如果講到依度你都仲要問「咁關𠝹票咩事」,咁我就唯有畫公仔畫出腸。

廣告

要做到傳說中「𠝹票」嘅效果,就要有兩個以上候選人係共享同一陣營嘅票源。假設林鄭氏、曾某同胡某都入閘參加特首選舉,而曾胡二人票源相同,咁又係只會有以下兩個情況:

甲.曾胡二人合共得票不及林鄭氏,林鄭氏得六百票以上當選。咁嘅話,其實就算曾胡二人其中一人冇參選,佢地陣營得嘅票都唔會變多,形勢比人弱,就冇贏嘅機會,唔關出幾多個候選人或者咩「𠝹票」事;或者

乙.曾胡二人合共得票多過林鄭氏。依個情況下,曾胡二人夾埋會多過六百票,根據《行政長官選舉條例》,得票最低果個就要走人,而如果走人嘅係曾胡其中一人,佢地陣營嘅票晌下一次投票亦都自然會落晒去留低嘅生還者度,即係所謂「𠝹票」都係唔會發生。

至於你話會唔會因為胡某參選令到本來投俾曾某嘅票走咗過對面,答案好簡單,建制投票都係「指令」同「利益」兩大原因,曾某箍不實嘅建制票,有冇胡某參選都係箍唔實,至於民主派選委投俾對家,你覺得會有可能發生咩?

同樣道理,安排葉劉氏入閘,亦唔會做到對林鄭氏「𠝹票」嘅效果。

至於而家甚至開始有「𠝹民望」嘅講法,就更加係痴孖筋。喂阿哥,如果民望可以左右到依個特首選舉,兩年幾前就唔使有咁多香港人瞓街爭取真普選啦。既然民望不能左右大局,咁𠝹嚟為乜?

所以,所謂「𠝹票」論,都係冇充分理解特首選舉規則下臆想出嚟嘅講法,晌現實情況下根本唔會發生。一般人咁講都猶自可,如果有民主派選委都係有咁嘅諗法,就真係唔該你地讀熟書先去對點使用手上神聖一票發表偉論,唔好犯下啲咁丟架嘅錯誤。

而家資訊發達,要搵資料十分容易,奉勸各位晌評論政治前做下功課了解下先。晌冇充分理解下評論政治都唔係最可怕,最可怕係有人同你講真相,你又不能接受自己柒咗而偏要為咗面子堅持己見錯落去,先係真正嘅可怕。

註:其實仲會有第三第四個情況,只係依兩個情況同「𠝹票」冇咩關係,晌度講下:

三.最高得票者得票不過六百票,第二最高票數有超過一位候選人,咁就有最高得票同第二最高得票果堆人再投過,直到投到兩個人出嚟私片為止;以及

四.兩人私片,冇人得票超過六百,冇人當選,選舉程序中止。

 

作者 facebook
 

發表意見