立場新聞 Stand News

2月28日 你投誰?

2016/2/17 — 1:35

台灣嘉義228紀念碑 (圖源:維基百科)

台灣嘉義228紀念碑 (圖源:維基百科)

今個月月底係新東立法會議席補選投票日。立法會新界東補選候選人包括:楊岳橋、梁天琦、劉志成、黃成智、周浩鼎、梁思豪、方國珊。

如果你想睇我出貼支持邊個候選人,抱歉,呢篇文唔會有任何意見/意向。唔係因為我覺得乜嘢直選區席議席18:17不重要、修改議事規則不重要、本土vs泛民、年輕vs年老、還是其他東西不重要,而係,立法會早已經不重要。

立法會,早已經不重要。尤其是,呢個議席只有幾個月嘅任期。我比較懼怕一啲評論或者意見,講到一個立法會議席有幾撚重要,無咗佢就世界末日,所以大家要含淚投票。我屌。當廿鳩幾席位幾年都係搞撚到一鑊粥,你同我講到呢個得幾個月嘅任期有幾撚重要,咪撚玩啦。我亦唔認同進入議會係某啲政治團體、人物嘅出路-你嘅出現,唔係正正因為議會垃圾無能?你入去,一起森巴舞乎?

廣告

我只係希望大家,不論你係支持楊岳橋又好、梁天琦又好,鄭智......啊係黃成智都好,甚至乎係周浩頂(唔識鼎個倉頡碼),你唔好淨係用社交平台去表達你嘅支持。Facebook好重要,係香港頭號社交平台.......但其實只係一個好細嘅世界,reach到嘅人來來去去嗰三五萬。

已經前前後後講咗幾次,希望你可以做以下幾樣嘢:

廣告

1. 搵出你身邊新界東、又係選民嘅朋友,whatsapp佢哋。唔好喺group whatsapp,逐個逐個發訊息問。唔熟嘅提醒佢投票、熟嘅咪說佢投畀某某。

2. 打畀你喺新界東,又係選民嘅年長一輩。問下佢哋投乜。然後動之以誠,叫佢哋唔好投畀某某、或者用孫嘅身份求下佢哋投畀某某。講咗好幾次,呢招對老人家,係work的。

3. 後生啲嘢,讀大學嘅,唔少有幫人補習。新東區嘅細路,全部有老竇老母(其實所有人都有)。你私補嗰陣,見到老竇老母,用10秒講一兩句得唔得?怕講政治、對方係藍絲無咗份私補?私補還私補、投票還投票?搵食啫,大晒呀?又或者倒轉,由個細路度入手得唔得?我係咪好黑暗?蛇齋餅粽就唔仆街?

一個人諗唔晒全部方法。我只係覺得,當Facebook一打開全部係支持某某嘅貼,好容易令人有感覺係某某勝算好大/大咗好多。no no no. 黃埔游蕙楨嗰次話畀你聽現實世界唔係咁。

而家係全民選舉義工嘅年代,你無退縮嘅餘地。人哋班含定剷做呢啲地區工作、透過地區滲透一票一票拎返嚟,再透過種票+轉移選民,選舉工程制度化咗好多年;而民主派只係能夠透過event-driven去拎支持。你唔行多步,輸撚梗。

唔好怕面矇,怕人拒絕你、怕人問你點解要投某某。你要說服人,就要做功課,徹底認識你推介嘅人有乜嘢好/對家有乜嘢唔好。呢啲嘢,你做第一次之後,第二第三次就好得心應手。你可以諗清楚,為咗你支持嘅人,可以去到幾盡。唔使話我知,自己諗清楚自己嘅位置同能力,just do it.

上次區選,有好幾個候選人只係輸少於廿票。如果有人肯打多個電話、發多個訊息,結果已經唔同。任何選舉,你能夠搵到一票游離票/無打算投票嘅人,或者吸走一張對家嘅票,已經係好叻仔-因為比起你原本得一票,你嘅influence 係多咗一倍。記住,香港立法會選舉嘅投票率一向只有約50%,即係另外嗰50%根本無投票。

至於仲有乜嘢方國珊、劉志成、梁思豪,啊,佢哋都有份參選嘅。

- - - - - - - -

本文並非選舉廣告。文中每個候選人共出現兩次。以下嗰啲先係廣告。

史兄近期動向:

(1)史兄《婚姻這種邪教》第四版已上市

(2)史兄新書書花《史詩式愛情》預訂(對唔治,已截)

 

(本文原刊作者facebook

發表意見