立場新聞 Stand News

2/3 阿媽

2018/5/19 — 10:18

【文、圖:Donna Yau(協助梁天琦等人面對暴動罪官司的法律界人士)】

七十日的審訊,終於告一段落。

裁決後,我在庭上哭了,可能有人覺得好奇怪,因為代表的D4一條無罪,一條達不到大比數,應該值得開心。但其實我喊,係因為天琦參與暴動罪成。

廣告

我一直都好疼錫天琦,經過兩年多嘅相處,一起處理了很多事情,覺得佢係一個十分有抱負、思想清晰、有領袖魅力、頭腦轉得快的年輕人,但同時也很單純、謙卑、有禮、十足鄰家男孩,不過有時思想極負面。(大家不妨看看“ 地厚天高”, 片中可睇到好立體及真實嘅佢。)

記得有一日,佢寫咗張卡畀我,上款係「給 2/3 阿媽」,我問咩係2/3,佢解釋話,我成日講,當佢係半個仔,但係佢覺得我比半個阿媽多,所以叫我 2/3 阿媽 ....

廣告

七十日嘅審訊,我每日都盡量抽時間陪佢傾下偈。記得佢問得我最多嘅問題係:「我係唔係唔應該返香港?」

我每次都問返佢轉頭,「你覺得呢?」佢每次都答我:「應該返嚟,否則對唔住認同我、支持過我嘅人,我要返嚟找數。」

在這七十日,讓我更加清楚天琦嘅成長以及他的心路歷程。其實佢跟大部分年輕人一樣,面對未來充滿不安,感到理所當然擁有的自由、民主逐漸被剝奪,年輕人完全掌握唔到自己嘅將來, 冇工、冇樓、冇前途, 佢話自己係一個「廢青」,好似完全冇出路咁。

初一事件,佢有覺得自己做得唔理想嘅地方,佢覺得「己所不欲勿斯於人」。但係我始終覺得,佢一直只不過係爭取緊佢應該擁有嘅權利。佢爭取嘅,亦都唔係為咗自己,而係幫我哋每一個香港人去爭取,但結果令自己瑯璫入獄。

記得有一日,佢同我講,喺佢對面嘅係殺人犯,隔離係強姦犯,再隔離係管有幾十kg毒品嘅毒販,佢問我,佢做錯嘅事,係唔係同嗰啲人做錯咗嘅事一樣咁嚴重?點解受到嘅懲罰,可能會同這些人一樣,我無言 ....

天琦,你將會失去自由一段日子,但我知道,囚牢的牆不比地厚,獄中欄柵不比天高。

2/3阿囝,你累了,先稍作休息,香港人會等你回來。

發表意見