立場新聞 Stand News

2016-17 財政預算案 — 離地中產(與死剷)表演錄

2016/2/24 — 18:48

不評論具體政策內容(因為沒有內容可言),只就開首1-10段及結尾173-180段作簡短分析。

──────────────────

廣告

「6. 相信很多朋友和我一樣,除了對事件(年初二凌晨旺角一事)感到痛心和憤怒,更會驚訝香港在一刻間變得陌生,想知道為何暴力的種籽會在不知不覺間滋長,憂慮我們一直珍惜的核心價值,會被暴力和仇恨蠶食。」

[評論]今日離地之選,1號佳麗。

廣告

『點解會搞成咁嫁?』係何等令人悉熟嘅辦公室、街市、股票行、茶餐廳對白。『點解會搞成咁嫁?』簡直係一眾沉睡中主角,每逢遇到新一代社會抗爭、政治事件時嘅金句。

由慈母喺街邊搵市民練拳練棍、領展太幅加租、黑打會隨意打人、李波等五人失踪、大學由惡霸loser主持、立法會粗暴剪布,『香港點解會搞成咁嫁?』、『呢個並唔係我熟悉嘅香港』、『今日係XXX最黑暗嘅一天』,可謂閒談中嘅三大熱門選擇,獨贏位置Q一定中晒。三者又恍如聖靈聖子聖父,三為一體(唔識耶穌可想像為精英大師搭告東尼搭高雅志)。

對我(同一眾較多上網嘅人)嚟講,『點解會發生』已經係多餘嘅問題,已經唔會再有人討論。重點係『幾時會發生』、同埋『下一步會有啲乜』。

仲有,如果財爺(同佢一眾朋友)真係有心想知『點解會發生』旺角一事,請盡早設立獨立調查委員會,作詳細研究及分析。Or fucking shut up. 你只是扮關心、扮理解。

──────────────────

「173. 主席,我在去年的財政預算案前夕,開設了一個Facebook帳戶,希望可以用一個比較多年輕人使用的途徑,為市民大眾介紹財政預算案,擴闊和更新跟大家溝通的渠道。社交媒體讓我有多一個角度觀察市民的生活,聆聽大家的心聲,包括一些在傳統媒體聽不到的訊息,一些被社會主流忽略的聲音。一年過去,我對當前香港的狀況,有了多一重體會。」

[評論]我好想知曾俊華加咗啲乜嘢人,可以令佢玩咗一年fb都唔知點解民怨沖天。唔好話你like咗啲社運、民主/本土網媒,你就算睇港人港地、幫港出聲,唔多唔少都知民間疾苦,媽聲四起啦。

大佬,你有入場睇卡塔爾嫁嘛?播國歌嗰陣你瞓著咗?

我估計,佢可能只係like咗100毛(日日hehe哈哈做人)、仲有buzzhaxx等content farm,只係知道「XXX震驚了十萬人的真相」。

──────────────────

「174.......即使政制問題已經隨着政改被拉倒而過去,社會對立情況並無得到紓緩,反而變得更加尖銳......議會無辦法平心靜氣議事論事,社會亦失去了對話的空間。」

[評論]今天離地之選,2號佳麗。

政改拉倒,政制問題就冇咗?政改係因為政制有問題,冇咗政改,政制問題就冇咗?你肚餓去買盒飯,大X樂畀盒有毒菜有抗生素嘅叉鵝飯盒你,你唔食,咁肚餓就隨住飯盒無咗而消失咗?That's goodest logic. 

正正因為政改無法有效解決政制問題而被否決,在過程中更突顯共產黨嘅無遮無掩嘅賤格,港府在處理政改上嘅無能,官員上嘅無恥,香港人先無奈佔領。

你老味!我係畀你迫去瞓街嫁!!!!!!!!!!!

你仲話我唔同你溝通。溝通道路一直暢通無阻,從來都係由政府單方面封鎖:反國教、HKTV發牌、政改,有邊一次政府肯認認真真出嚟見市民,溝通半句?最後香港人更加絕望,最後趕狗入窮巷,走上反抗反擊嘅道路。

最想同你溝通、同你傾嘅日子-亦即係事情仲有回頭路走嘅機會-已經成為過去。係你一手拋棄,可以怨誰?

政制一日不改,事情不會有改善。

──────────────────

「5. 在兩個星期前的年初二凌晨,旺角發生了嚴重的『違法』事件,有一小撮失去理智的人,對執勤的警務人員和『採訪記者』作出嚴重的暴力行為,引發大規模的『暴亂』,造成數十人受傷。」

[評論]平心而論,相比起689,此處用字較溫和,例如只稱『暴亂』。留意一點,對『採訪記者』作出嚴重的暴力行為的,包括慈母。似乎胡鬚佬亦不滿慈母嘅惡行。如果我寫,會咁寫:

「5. 在兩個星期前的年初二凌晨,旺角發生了大家不願意看到的衝突,因為種種原因,有人作出暴力反抗,引發混亂,造成數十人受傷。」

689版本

「5. 在兩個星期前的年初二凌晨,有班港獨暴徒於旺角作出暴動。總知你哋係暴徒。你哋係暴徒你哋係暴徒你哋係暴徒你哋係暴徒你哋係暴徒你哋係暴徒你哋係暴徒你哋係暴徒你哋係暴徒你哋係暴徒你哋係暴徒你哋係暴徒我哋係暴徒我哋係暴徒我哋係暴徒我哋係暴徒我哋係暴徒我哋係暴徒我哋係暴徒我哋係暴徒我哋係暴徒我哋係暴徒我哋係暴徒我哋係暴徒」

──────────────────

「175. 作為香港一分子,我對這個情況感到憂慮。造成今日的局面,成因千絲萬縷。我們除了要真正了解問題所在,更重要是要有決心去解決困局。如果我們任由問題惡化,香港的未來必然會更加紛亂,下一代將會在仇恨的氣氛中成長。

176. 有一位政治家曾經講過:「我們的問題是人為的,所以人自然有方法將問題解決。」解決香港的問題,我們當然要倚靠我們自己,不可能假手於人。當各方面能夠放低短期的政治考慮,重視香港的長遠利益,社會才有機會回歸理性。這個過程會是相當漫長,我們需要恆心忍耐,讓社會一步一步復元。」

[評論]那個政治家是約翰·甘迺迪(John Kennedy)。

呢兩段其實唔使印出嚟,佢錄低佢畀689聽就得。問題、成因當然千絲萬縷,但689係當中一個主因。就因為689唔叻,所以先搞出一鑊粥出嚟。

──────────────────



史兄近期動向:

(1)史兄《婚姻這種邪教》第四版已上市 ;(2)史兄新書《史詩式愛情》;預計3月底、4月頭出版

──────────────────

廣告時間:不要問,只要like,仆街史兄的專頁同IG。

FacebookIG (主要用嚟睇女仔) 

發表意見