立場新聞 Stand News

616,星期日,「又」遊行?

2019/6/15 — 8:28

6.9 大遊行

6.9 大遊行

無錯,標題呢句係好多人-包括我-喺得知民陣星期日又搞遊行時候嘅反應。

然後,我問咗自己一個問題:

「今日(6月14日),同上星期日未行之前,喺爭取撤回送中條例上,實際形勢有乜改變?」

廣告

無!

無!

廣告

係無呀!

政府無撤回條例,立法會班保皇狗依然想開會。唔係上星期三大批市民上街佔領2.0,個會已經開咗三日咧!

除非你話班癲狗亂開槍亂捉人,咁多市民學生受傷係一種成功爭取或階段性勝利、又或者仍然自豪103萬人上街,否則,今日同上個星期係完全無分別,依.然.未.撤.回.條.例!

大禹治水,三過家門不入;
孫中山搞革命,來來回回十次先叫做成功推翻滿清;
暫時大家行咗一次(最多三次)。

面對一條影響香港千秋萬世、你自己同子孫喺香港未來27年嘅惡法,絕對不可能行一次就當完成任務。你就當遊行係一項投資,成功咗你暫時免除一種重大擔心同憂慮。

只有政府撤回惡法,任務才算基本完成。

你問我想唔想再遊行?如果話想嗰個都低能嫁啦。首先,我好憎行路(而家玩Pokemon Go索性用飛行器);第二,中意行路都唔代表個個星期要陪你咁行。

只係,

我係香港人,
我對呢度好有感情。

如果我行多次,可以再多個機會再畀壓力個仆街政府,我一定會再做。人哋法國黃背心運動持續咗幾星期、泰國衫軍又幾個月,而家行一鑊就退?香港人質素會差得過其他地方?

再者,上星期有103萬人上街,即係乜啊?有600萬人未去啊。

你問我有冇Silver Bullet,立刻圓滿解決呢件事?我即刻答你:「有,但全部係犯法」-唔係差佬老屈你暴動嗰隻,而係正常人都會覺得唔合情合理嗰隻犯法。

喺欠缺Silver Bullet下,大家真係要行多次。你要有心理準備可能要上多幾次街,仆街政府先會收手。我更加肯定,唔係得遊行可以帶嚟改變,好多時大家嘅做法同諗法係互補不足,互惠互利,無突衝、唔係排他性。嗰日無啲司機喺金鐘道撞車、無人嗱嗱臨買啲頭盔面罩眼罩去,星期三四五,班仆街開咗會啦!

總結,
616,我會再上街。

今次嘅要求,唔單止係撤回送中法,個人認為起碼三點:

第一,
不撤回,
不罷休。

第二,
立即釋放所有被捕人士及停止一切法律追究。

第三,
嚴懲所有不合理使用暴力及武器嘅狗。

(我係話緊你啊,死仆街警察!話你係狗係侮辱緊狗!柴犬幾可愛先得嫁。)

───

(註:

你唔中意民陣、唔中意遊行捐錢,咪唔好捐囉!!!我一毫子都未捐過。
你唔想由銅鑼灣行咁遠,咪喺灣仔地鐵站出發囉!!!!)

發表意見