立場新聞 Stand News

【技術文】689 與各地政治人物嬲嬲分析

2016/2/27 — 18:51

【文:嚴嶽】

(技術長文,少量粗口,慎入。)

你有冇見過一個政治首長可以咁乞人憎?我見過,我真係見過。

廣告

當大家今日仲諗住煩今日個Facebook點解突然多咗啲乜嘢「嬲嬲」呀、「慘慘」呀,第時呃like自high擔心俾人藐唔知點應付好嘅時候,我哋親愛嘅「超然」特首689已經第一時間撲出嚟俾大家熟習下呢個新功能,上面所謂嘅擔心實在唔會比用9秒9速度向689贈一個「嬲嬲」重要囉。知唔知道我由晏晝返工睇住個數過5千,1萬、2萬,一路爆上個走勢仲勁過啲牛市(雖然而家個市其實唔係啦),我嘅心情係幾咁興奮,幾咁hyper…… 我寫呢篇文嘅時候,個「香港僱主聯合會春茗」post嘅嬲嬲已經過左6萬9,成件事仲要已經柒出國際上咗CNN Money。

但最令我估唔到嘅係,各位對689嘅果份關愛,果份「齊心」係延伸到成個page,有講法係連佢10月初開fb嘅相都俾人掉低個嬲嬲 - 甚至包括佢最新張profile pic,係以長江後浪推前浪嘅姿態超越咗「春茗」果個post,嬲嬲數已經超越6.89萬同埋7.3萬兩個心理關口,即係每100個香港人就有1個撳呀!係1/100呀!邊個政治領導可以做到佢咁呀!你搵俾我睇丫!

廣告

(1)

因為實在太好奇的關係,我已經自行搵咗一啲各地政治人物的fb page之profile pic的數字做個比較*:

其實邊個嘅嬲嬲數一枝獨秀根本就呼之欲出啦,但整個表出嚟都想俾大家睇吓成件事有幾荒誕,我哋香港到底有幾exceptional。以下同大家帶幾個重點:

上表12個人當中,有9個人嘅嬲嬲percentage都係喺1%以下,只有3個人例外,就係689,納吉同埋Donald Trump。

如果計嬲嬲嘅實數,有4個人嘅數係過咗100,包括689(7個)、納吉(1個)、特朗普(1個)同埋希拉莉(1個)。

689係唯一一個嬲嬲數多過like數嘅人。

新功能只係推出咗1日鬆啲,但如果按照上表,即係話各地民眾基本上都冇因為新功能推出咗後,對佢唔喜歡的政治領導瘋狂俾嬲,去作為一種表態。特朗普呢個連「禁止回教徒入境美國」當競選呼籲去講都夠膽死嘅癡線佬,有成千幾個即係1成嬲嬲率,外國人眼中可能已經好大件事;至於納吉嘅政治往績同埋姿態都累積唔少反對佢嘅人,過咗成日有1.6萬個即係接近8%嘅嬲嬲率,其實都值得關注。但我想講,佢哋兩個連689車尾燈都望唔到呀,係望.唔.撚.到.呀!

(2)

講番轉頭,其實我諗profile pic. 呢個point嘅時候,會諗點解689張車頭相(Sor, 係大頭相至啱)最終會多嬲過個「春茗」Post?我相信除咗係因為佢真係樣衰同埋面目猙獰之外,個Post其實都變相帶咗啲人流過去張profile pic. 度,之後大家情不自禁忍唔住手順手撳掣有撳唔撳罪大惡極乜乜乜都已經係之後嘅事喇。咁如果掉番轉去諗,如果689冇出個「春茗」post,大家係咪就會因為冇喺news feed見到689個壽頭,就唔會排住隊招呼佢?

所以我又整理咗個合表,俾大家留意下政治人物喺新功能推出後開post,到底會唔會拖累佢哋呢^:

又講幾個重點:

12個人當中,只有馬英九同埋奧朗德冇喺新功能推出後開Post。而喺其餘10個有開Post嘅人入面,除咗689同埋納吉,嬲豬佢哋嘅民眾真係撳個嬲嬲掣就會完事,基本上唔會撳埋落去profile pic再嬲多鑊。

有樣嘢得意嘅係,特朗普profile pic嘅嬲嬲數高過佢啲post嘅嬲嬲數幾十倍,憎佢嘅人其實係專搵佢張profile pic落手。

12個人當中,7個人嘅最後發帖嬲嬲率喺1%以下,3個人在10%以下,其餘兩位就係納吉(72.9048%)同埋689(96.7006%)。

689同埋納吉最後發帖嘅嬲嬲數都過萬,其實都好多人唔妥佢哋兩個。

689喺前後兩個object度,不論係嬲嬲percentage還是實際數量,都有超強嘅吸納,甚至倒升(96.7006% -> 94.5056% / 69373 -> 75544)。呢樣嘢同納吉大致上好似,只不過係納吉張profile pic本身有好多人like,令到嬲嬲percentage大跌(72.9048% -> 7.9760% / 16841 -> 16768)。

但以實際數字嚟講,689仍然寫下咗創舉囉。

(3)

大致上嚟講,從以上兩個小小觀察睇到,可以話對於大部分有民主選舉制度嘅國家人民嚟講,佢哋對於將嬲嬲醒俾唔鍾意的政治人物,呢件事嘅意欲始終唔算好高,與其俾嬲嬲,佢更傾向唔睇或者唔表態,總之就who fucking cares一於懶理。當然功能出咗只係一日左右,話唔定佢哋慢熱啲,我都講唔實。

但有樣嘢相信嚟到呢度你都會睇到,就係689同埋納吉都係好叉多haters,尤其以689為甚,根本上大家琴日一見到689喺fb就會諗都唔諗就撳嬲嬲咁滯。而呢兩個地方嘅選舉制度或者處理手法,甚至係政治領導本身嘅民意認受性,都係.好.撚.有.問.題。

馬來西亞嘅當權者就靠gerrymandering同埋舞弊維持政治優勢,首相涉嫌貪污醜聞又會甩到身;我哋香港都唔輸蝕,有個低票當選,蟻民廢青冇得揀嘅行政長官,收咗5千萬但係佢一條毛都冇少過;前年有十幾廿萬人喺條大街度stay咗79日爭取真普選,最尾竟然可以當咩事都冇發生過;委任咗仇恨心極重嘅權貴去管理城內最高學府,由得佢搞鍋又冇所謂;有香港人用「自己方式」「坐洗頭艇返大陸」你又唔施壓;想睇優質電視就偏唔俾你睇、你想周街篤魚蛋就偏唔俾你篤、爆出個旺角騷亂喇,又話你班友仔係暴徒、專搞暴亂。咁即係乜料呀!?如果個社會唔係咁荒唐,當權者嘅民意認受性咁低,又點會發生喺特首fb瘋狂撳嬲豬咁嘅事?又唔見其他總統總理首相市長係咁?!再睇番蔡英文同埋柯P,你就會覺得點解可以差咁柒遠嘅呢!

做埋咁多衰嘢有個關公傍身真係好正常,但身為一個地區嘅政治領導玩Facebook玩到咁虛怯又真係世間稀有,所謂嘅關公已經同佢屋企啲僭建已經「唔存在」。未有reactions之前就只係like同share,唔係friend都唔留得言,結果所有comment都係有唱好冇唱壞,好似個世界圍住佢自己轉咁。而家你都有今日啦,就算Facebook冇dislike掣,一人一個嬲都玩Q死你。其實冇嘢嘅,受唔住咪大不了執柒咗佢囉,橫掂你「洗版」又唔知、俾「其他人」add咗個AV女優落account度又唔知,你以前都冇account 㗎喇,對不對?

P.S. 收筆果陣差唔多7萬8,我對大家衝上10萬好有信心,加油。

(編按:2月27日週六一時前已破十萬大關)

*^ 取得數據時間係2016-02-27 03:49-04:11。

 

作者簡介:一個經常俾人話腳頭唔好,但覺得自己其實已經好幸福嘅土生廢青。做人最緊要係識得擘大雙眼,望清楚個世界、同埋望清楚自己。

發表意見