立場新聞 Stand News

7.27 劇本已經寫好,大家又會點做?

2019/7/26 — 10:07

7 月 22 日,特首林鄭月娥、保安局局長李家超、警務處處長盧偉聰與一眾官員召開記者會。

7 月 22 日,特首林鄭月娥、保安局局長李家超、警務處處長盧偉聰與一眾官員召開記者會。

7.25 差唔多同一時間發生兩件事:

  1. 鄉議會主席劉業強會同十八鄉鄉議會主席等開記者會,一再強調尊重市民和平示威嘅權利,7.27 就算有示威都好,只要唔入村、唔衝擊,會本住「人不犯我,我不犯人」嘅原則,只會保家衛村,唔會主動挑釁。
  2. 同一時間,警方對發起 7.27 元朗遊行嘅市民發出反對通知書,禁止 7.27 遊行於元朗進行,提出以公眾安全、影響交通、糾察不足、起點不適合等原因拒絕遊行進行,等同定性 7.27 元朗遊行(如有)係非法集會。

警方真係好合作,人家寄封信嚟警告「後果自負」就發出反對通知書,唔俾遊行進行。

成個局係定性 7.27 係非法集會,首先會嚇怕咗一啲和理非嘅示威者,唔會肯冒住「非法集會」嘅罪名行出嚟,人數會比預期少,因為成本高咗;

廣告

另外一個效果就係剝脫咗港人集會自由嘅權利,令堅決嘅示威者更加憤慨、更加激進,更加覺得要當日行出嚟,亦更大機會引發暴力衝突。

簡單而言,一封反對通知書客觀效果就係從反對市民嘅內部進行分化。

廣告

喺 7.21 之後,政府同警方受到史無前例龐大壓力,連本身淺藍及中立嘅市民都睇唔過眼警黑合作,所以先有大量紀律部隊、以至公務員表態,所以極需要一個洗底挽回民意嘅機會。

7.27 嘅劇本會係,村民扮演受害者角色,只會保家衛村,鏡頭對準入村施暴破壞嘅示威者,有幾煽情都得,迫於無奈先至作出抵抗,白衣人當然唔會出現(舊數未清新數免問),寡不敵眾之下向警方求助。

警方當然會果斷執法,配備精良裝備,拘捕暴徒,保護無辜村民,並控以「非法集結」、「襲擊」、「傷害他人身體」、以至暴動罪。以彰顯警方保護市民生命財產嘅決心同能力,挽回劣勢。

事後,林鄭又可以列隊連同盧偉聰出嚟再強力譴責示威者係暴徒,傷害無辜市民嘅生命財產,更加證實 7.25 發出「反對通知書」決定正確,連同前兩日何律師父母墳被刑毀,唔查都知邊個係兇手。7.21 就再無人提起,無人再記得班白衣人邊到嚟,風聲過咗,交幾個蛋散獻頭,就了事。

劇本就係咁寫,大家咁聰明 7.27 會點做?

 

(標題為編輯所擬)

發表意見