立場新聞 Stand News

777 後仲可以做乜?

2017/3/27 — 19:18

有選委在點票中心拉起慶祝林鄭月娥當選的字牌,而作者就感到欲哭無淚。

有選委在點票中心拉起慶祝林鄭月娥當選的字牌,而作者就感到欲哭無淚。

【文:斐斐】

777當選後,作為一個全職媽媽的我,當刻只有呆坐,欲哭無淚,不知如何反應。

當然心裡一早有所盤算奶媽有中聯辦的照顧,薯片要勝出,多少要靠良心及天父保佑才能實現。但是下一步香港仲可以點樣行? 一眾媽媽及朋友的對話離不開移民,覺得好灰。

廣告

其中一個媽媽說,她在潮州的親戚四五歲,返學唔準講方言,話「文明人講文明語」,佢哋已經唔識講潮州話。相信中共要滅一個地方嘅文明,滅佢哋既方言係佢地慣常嘅做法。該媽媽更感言中央都唔會珍惜香港嘅文化,只有等消失。我聽見後直覺心寒,不就是像《十年》套戲咁,到時小朋友交談只會講普通話,我個仔的下一代可能連廣東話都唔再識講。

作為一個香港人我真係好唔咁心就咁眼白白睇住香港一直被大陸化,繼續俾新移民溝淡香港,到時佢哋變咗多數,我哋變咗少數族裔都唔出奇。2047都唔係好遠嘅事,呢三十年裡面剩低既文化,價值觀,好可能因777上場而被蠶蝕得空空如也,庫房繼續被大白象大口大口地吞噬;香港呢塊肥豬肉亦不停被貪婪嘅大陸官商舔乾乾淨,全變成他們的基地。

廣告

如果我哋呢代人守唔住香港嘅獨有文化同埋價值觀,以後就唔會再有人在講乜嘢獅子山精神。連方言都冇埋,周圍變曬簡體字,西九文化變曬故宮果類契丹文化,完全冇曬香港特色。所有殖民地嘅蹤影完全滅乾滅剩,豆腐渣工程、食物安全問題、不公義既日子每天發生。出街隨地大小便變得好自然,所有小朋友都變得好愛國,唔入建制搵唔到食……呢個會唔會係我哋將來嘅香港?我覺得好可怕。

薯片叔叔俾咗香港人一個希望,就算佢輸咗,我哋香港人亦可以齊心去建立一個團結信任同有希望嘅香港,每一個香港人自己出一分力,守住自己嘅文化。唔使等教育局去做嘢,自己就首先教好小朋友學好廣東話。我有朋友嘅小朋友,由細到大喺普教中嘅學校讀到小學,佢睇中文係唔識讀廣東話嘅音,淨係識讀普通話,仲要最好有埋拼音先識讀,乜都唔做真係有可能連母語都唔識。

我哋每一個人,都可以身體力行去做返一個守望相助、互相扶持、彬彬有禮嘅香港人。儘量同大陸人講廣東話,唔好就曬佢哋去講普通話,我哋可以去主動教佢哋廣東話。好似Ben Sir喺杜Sir嘅飯局裏面清楚提出要保育粵語活育粵語,香港要守住廣東話呢個語言,唔可以俾佢消失。因為如果連一個地方嘅語言都冇埋嘅時候,仲點會係一個我哋所認識嘅香港?

香港人不嬲向錢看,如果我哋唔齊心一致去活育我哋自己嘅文化,好相信香港遲早會變成大陸其中嘅一個普通城市,唔會係我哋仲想留喺度嘅地方。趁宜家仲有時間,仲有機會嘅時候,懇請大家齊心協力,用你嚟緊手中嘅一票,將所有建制 全部踢走。守住老人院、守住每條屋村、教佢哋唔好俾蛇齋餅粽利誘叫投乜就投乜,每一個都要企出嚟守住香港陣地。

我哋一定唔可以失去希望,唔係同條鹹魚冇乜分別。為咗下一代著想,呢三十年唔可以俾佢白過。尤其是教育方面,唔可以俾佢哋洗腦變成奴隸,每個家長都好有責任去講解畀佢哋嘅小朋友聽,同埋身邊嘅新移民聽。如果新移民繼續想喺香港住得安安樂樂,擁有言論自由,唔該請融入香港嘅文化,唔係俾你哋反殖民。我哋自己主動去同化佢哋,係一條出路,唔係就淨係俾佢哋嘅同鄉會派錢任意擺佈。

如果大家唔想自己嘅下一代活喺一個無公平、無公義、敢怒而不敢言既鵪鶉日子,不如大家一齊去思考一下我哋各自喺唔同既崗位可以做些什麼事去守住呢個香港。由最少既廣東話,到公民意識,到珍惜香港文化,去實踐「信任」、「團結」同「希望」。自己唔好磨滅自己既意志,於剩下既三十年主動去作同化,將會係我哋最值得為自己及下一代去做嘅事。

 

自我簡介:一個擁有四歲及兩歲嘅全職媽媽,希望大家能於呢片愁雲慘霧嘅時候能振作,重燃希望。

發表意見