立場新聞 Stand News

8 月 5 日,忘記自私與利己。為香港將來,體現無私與利他。

2019/8/5 — 0:00

8 月 5 日,將會係香港百年難遇嘅大罷工,亦係近期民意戰嘅重要一役。

有別於周六日遊行示威,罷工牽涉到一定程度上嘅生計犧牲。

而我好想知道,究竟有幾多和理非,願意為自己口口聲聲話愛嘅香港去付出。

廣告

聽日嘅人數,有重要意義。數字反映香港人對締造改變嘅決心。

If you don’t sacrifice for what you want, what you want becomes the sacrifice. 若果你仲係喺屋企開住冷氣隔空聲援後生仔嘅犧牲,若干年後你必定會為未盡一己之力冇企出嚟而遺憾。

廣告

有人留言問我,覺唔覺得「光復香港 時代革命」呢句口號唔好,因為俾人有口實係宣揚港獨。

坦白講,今日我地叫乜嘢口號,中共都可以硬夾屈背後嘅精神係港獨。

光復香港,唔係要獨,而係反映我地唔要濁:污濁個「濁」、混濁個「濁」、惡濁個「濁」。

光復香港,係要恢復我地熟悉嘅香港,拒絕中共嘅濁化。

我地要光復香港嘅自由,可以免於恐懼暢所欲言,唔會再有銅鑼灣事件之類嘅野蠻暴行。

我地要光復香港嘅多元,傳媒、教育、出版唔再俾中共滲透,容讓思想百家爭鳴。

我地要光復香港嘅法治,向只附從於極權嘅人治說不,成立獨立調查委員會去還各受害人嘅清白。

我地要光復香港嘅文明,抵制從中國輸入嘅低劣文化,重新與國際高質文明接軌。

呢場運動,因反送中而生,但所結集嘅民氣,造就對光復香港嘅覺醒。

我地唔係強求,我地唔係貪心,我地只想要返本來嘅香港。

豈能盡如人意,但求無愧於心。大罷工有冇用冇人知,但點都要盡一分力,唔能夠愧對香港呢個家。

8 月 5 日,忘記自私與利己。

為香港將來,體現無私與利他。

作者facebook

原文無題,題為編輯所擬

發表意見