立場新聞 Stand News

8 月 5 日,我罷工

2019/8/2 — 12:07

8 月 1 日晚上,有年輕人在沙田新城市廣場請求市民參加 8 月 5 日大罷工。

8 月 1 日晚上,有年輕人在沙田新城市廣場請求市民參加 8 月 5 日大罷工。

如果我睇到呢張相,8月5日都仲返工,

我覺得,

我人生是徹底白過了。

廣告

*   *   *

呢幾日喊咗好多好多次,數字係過去五年總和。

廣告

我同好多朋友籌旗,等啲年輕人有防具盡量唔好受傷、等佢哋食到飯。

佢哋畀戶口號碼我嗰陣,好多唔覺意顯示到戶口結餘。

你知唔知,有幾多個係戶口得$20、$30?

你知唔知?你知唔知?

有兩個銀行結餘係負數啊!-$134, -$17。

有個父母係藍絲,知佢去示威實施經濟制裁,佢連複診睇醫生嘅錢都冇。

好幾個因為要去遊行,冇時間返 part time,已經洗晒細細個開始儲落嚟嘅利是錢同積蓄。

啲人話遊行有錢派,派你老母啊。

好幾個同我講,佢哋行得好前,不過仲用緊 N95,只係想我送個豬咀護鏡畀佢。

你答我,

要具備何等勇氣、要擁有幾堅強嘅信念,你先會喺你戶口得返 $12 嘅時候依然唔放棄?

*   *   *

呢個星期我接觸呢啲年輕人,幾乎每日都有十個八個類似個案。

我以為我會麻木。

但我每次見到佢哋講自己身世、send 過嚟啲戶口結餘係十位數,眼淚就不斷跌落嚟。

係完全停唔到。

而家佢哋唔係食飽飯太多錢去搞事,而係呢個社會、呢個世界、成年人們畀唔到希望佢哋。

啲藍絲父母,你究竟係咪人嚟?你有冇用時間去了解過點解仔女要上街?三句唔埋,一嘢就cut 零用。點解細路就一定唔識諗?點解大人一定啱晒?

然後,當我話要幫年輕人、解決燃眉之急,起碼食飽飯、有交通費先(大佬啊,你連車費都冇點去遊行現場),啲年輕人全部話覺得自己廢、自己係負擔,唔想伸大手板拎人嘢。佢哋諗咗好耐、猶豫咗好耐先肯搵我,因為覺得自己好冇用。

究竟一個社會有幾仆街、幾墮落,先會迫到一班戶口冇晒錢嘅年輕人依然載住 N95、冒住坐十年監嘅風險走出嚟?然後每日要捱餓、捱窮、捱打、捱鬧,不過係為咗幫幾個仆街官做出嘅愚蠢決定執手尾!

你可唔可以話我知點解?

*   *   *

年輕人,你哋唔係孤軍作戰。一場仗,各人有各人嘅崗位,互相合作,各司其職。

手遊啲 RPG,角色通常有戰士、補血、坦、魔法師、遠攻,大家係一 team 人,最強嘅隊伍從來係乜角色都有,唔會清一式得戰士。

有好多人支持你哋,雖然佢哋唔係時刻企喺你隔離。

我唔會放棄你哋,你哋亦唔好放棄。

*   *   *

作為成年人嘅你,

8 月 5 日
不要讓年輕人孤身上路

8 月 5 日
我罷工

8 月 5 日
請你一起罷工

8 月 5 日
全港一起罷工

發表意見