立場新聞 Stand News

8.18 集會點滴

2019/8/18 — 22:14

圖片來源:作者 Facebook

圖片來源:作者 Facebook

1. 今日所有出嚟嘅人真係辛苦哂,係「真辛苦」,絕對唔易行。

2. 三點後幾乎全程落雨,雨勢有時頗大,但幸好未至狂風暴雨,撐着傘還是可以的,但撐幾小時傘也很累,而且一樣濕哂,因為人太多,雨傘「打交」嘅情況常有,當然有不少人係沒有舉傘嘅禮儀常識,我就畀人插咗幾次頭,也見到有人因此而爭執,但整體嚟講大家都好忍讓,明白人多到咁又無指定路線行,只能靠自律,就係咁。幸好,呢啲日子出得嚟嘅一般都好高質素。

3. 警方可能諗住,反對遊行,就冇人出嚟,真係天真過天真嬌。結果就更多人出嚟集會,咁因為唔係遊行,冇得喺唔同地方插隊,結果人人都要去維園,於是迫爆哂所有可以去維園嘅地鐵站同路。我 6.9 和 6.16 都喺炮台山出行去維園,人係多,但絕對冇今日嘅炮台山咁多,多到要排差不多半小時先出到地面,咁當然係因為銅鑼灣同天后已塞爆哂,所以好多人揀炮台山出然後行去維園。

廣告

4. 維園係絕對容納唔到咁多人,加埋人人撐傘,大家迫住走得更疏。今日出嚟嘅黑衣人係冇撐警人士嘅絕技 — 不懂疊羅漢也不能像遊魂野鬼一樣令自己好似空氣咁飄浮(不然添馬公園點容納 47 萬人),所以結果維園就好似一個滿瀉嘅盆,人潮如水向維園四周流溢,各區都係人,佔據哂道路係自然而然嘅事。

5. 唔畀遊行另一個壞處,就係當你去完維園諗住返屋企嘅時候,因為冇警方封路同指示,也無民陣嘅糾察喺條街上維持秩序(因為今日係唔畀遊行㗎嘛),結果同一條路,有一大班喺維園出嚟嘅市民,同時中間又插一大班要迫入維園嘅市民,形成互相爭路嘅慘況,加上全程落雨人人擔遮,冇人指揮和疏導,一切靠大家執生,少啲耐性都唔掂。但唔知點解喺呢啲場合,香港人嘅耐性和涵養仲高過日本人。

廣告

6. 我喺維園經名店坊穿出告士打道諗住返屋企,就出現以上情況,塞塞塞塞咗好耐,個個嗌「開路」,但當你行到出去,你會發現「開乜嘢路」呢?嗰度根本一個警察都冇,根本冇人攔住大家,純粹係啲巴士走唔到塞住條路,同埋同一條路一半係出一半係入,令到條路塞住。最後大家合作讓路畀兩架巴士走咗,出到登龍街過咗樽頸位,豁然開朗,成條告士打道就畀你行哂,一啲阻塞都冇。

7. 喺出告士打道(怡東酒店嗰頭)迫咗成粒鐘嘅期間,有架救護車要過,今次自己成為紅海一部分,見證咩叫「分紅海」。

8. 今日人數無法估計,但以過往經驗估算,過百萬是肯定的了,但實際人數我諗冇辦法點算,因為根本冇人「遊行」,市民分散到很多不同道路(好似告士打道西行全部畀人行,唔係第一次都好少見),又無起點又無中途點又無終點,都唔知點計。

9. 但幾多人都好,總之就係:好 X 多人!今天是 7.21 元朗恐襲的第四個星期,即一個月了,中間經歷了很多很多,還有機場所謂的「輸了一仗」,但結果,今日仍然有過百萬人冒着大雨走出來,就係話畀大家聽:即使輸了一仗,但民心沒失,大家都諒解,覺得好少事,不分化不割蓆。

10. 今日全程我一個警察都見唔到,所以今日好和平,完。

11. 風雨中抱緊自由,香港人加油。

 

作者 Facebook

發表意見