立場新聞 Stand News

8.5 圖像很難說得清的故事 — 4 名手執「武器」的黑衣少年

2019/8/6 — 10:38

photo credit: Joey Kwok

photo credit: Joey Kwok

自問擅長以圖像說故事,但係 8 月 5 日晚,荃灣嘅畫面絕對令人誤會,甚至成為抺黑材料。

話說全港大罷工日下晝,我一直跟住荃灣示威者,由荃灣警署走到大窩口警署,所有人被催淚彈打散,然後快閃到葵芳警署,再去荔枝角警署。

到地面跨過長沙灣道馬路時,突然出現嚴重分歧:傳聞荃灣出現藍衫打市民,有人想繼續快閃警署,有人想返去荃灣救人。最後決定返去,守護荃灣街坊。

廣告

本來兩手空空嘅嘅示威者,返回荃灣後,每人手執工具武器,巡視每一街頭角落,藍衫消失得無影無蹤,街上亦無任何警察,大家由 9 點搜尋至 10 點,並正打算 10 點半解散。

抵達荃灣公園休息,有示威者晌沙咀道公園搵到箱藍衫,拎咗到荃灣公園展示,方便記者報道。(詳情見立場新聞

廣告

晚上 11 點,原本數十名示威者已經離開,只剩低 4 人,收到通知市中心有人遇襲,考慮過風險,認為即使人少,依然義無反顧要去救人,希望沿途有幸遇上義士加入。

一位手執玩具刀,一位拎遮,兩位拎棍(一位失去咗口罩,一位無頭盔,但佢哋唔在意),急步趕到沙咀道眾安街。抵達時打鬥已經結束,傷者正運上白車,示威者與樓上疑犯對罵,現場留有大量血跡。

然後就係防暴警瞬速到場,驅趕所有示威者,然後無任何調查拘捕,快閃離開眾安街。(詳情見立場新聞

晌示威者搜尋藍衫期間,我不斷思考點影相好,無論點樣影,圖面都係一班黑衫幪面人,連群結黨手執武器遊盪。我要保障私隱,唔能夠走近特寫佢哋嘅眼神,充滿住純真正直但有點驚恐。

只有與佢哋擦身而過市民,先感覺到佢哋不帶一絲殺氣。示威者巡邏期間,整過荃灣非常平安。

作者Facebook

發表意見