立場新聞 Stand News

ABCD

2017/2/9 — 13:18

梁國雄、曾俊華、胡國興、林鄭月娥、葉劉淑儀

梁國雄、曾俊華、胡國興、林鄭月娥、葉劉淑儀

其實舊年夏天,眾志參選果陣,特登做左塊背景板,好靚的,大致係刪左ABC,寫左個D字。D for democracy。

朱凱廸呢?無線電視論壇,其中一個 bite 就係,「我相信梁振英下台同埋坐監係所有人共識,問題係我地想點,民主運動可以點樣行落去」。現場的泛民候選人,沒有人願意接話。

當時,就算不是所有人岩聽,但至少不是惹來萬箭穿心。所以其實冇呃票,所有野其實冇變過,問題仍然幾時都係同一個︰「民主運動應該點行落去」。

廣告

變既係當 ABC 變成真實的 campaign 後,大家變得超級有感受。進取的意見不但顯得不識時務,簡直係「阻人發達」,「多謝夾盛惠」。所以回頭還是要再問︰CY 禍港5年,究竟對香港人黎講,內容係咩?

如果我睇黎,CY 一開波就話土地問題係重中之重,其實係回應緊 2010 的反高鐵運動。CY 的大戰略就係,用盡一切方法,由行政到論述,反反覆覆,不斷創造佢「發展房屋(地產+中港任務) vs 保育」的假對立。5年下來——樓價租金繼續上,巿區越來越難住得起,蟻民焗住輪公屋或搬去新界。東北一上場就改為史上最大規模的「公私合營」,幫幾大地產商套現;坪輋從「新界東北」剔出,因為要創造規模大20倍的「新界北」;河套由高等教育變深港創科。

廣告

綠化帶發展90塊地,橫洲摸底即跪。啟德瘋狂賣地,起動九東商業樓面達近五千萬呎,全港各個發展區加埋相信商業樓面逾一億呎。大嶼山發展重新起步,1000公頃填海,興建海中死水孤城,造就幾千億跨海大橋,打通港珠澳口岸與港島心臟。小蠔灣欣澳又填,龍鼓灘要填200公頃(10個維園),馬料水又填60公頃,將軍澳137區的60公頃,也可能開發可容納10萬人的新區。尖咀、銅鑼灣等地全部掘起幾層做地下商業,岩洞又研究發展,舊礦場又發展,鐵路上蓋全部發展。

郊野公園劃出低生態區,一不離二二不離三。四千公頃農地圈出幾十公頃農業園,或最多一千公頃的農業優先區,正是為了部署將來對餘下三千公頃農地起筷。2030+ 仲話要重建 25.8 萬個舊樓單位。高鐵港珠澳繼續超支繼續 cap 水繼續未做完,二千億三跑正式起動。就只有會所用地檢討一直未見影,富豪繼續打波傾生意,棕土研究再拖兩年,和哥想點有偈傾。

如果你望一望中國大陸這20年來光速的都巿化,北京去到第幾環,廣州東莞深圳地鐵規劃的全面接壤,就知道 CY 個腦裝緊啲咩。所有前朝做不到、冇錢做,但好想做的「發展」,他都幾乎超額完成了。

這個把珠三角變成全都巿區域、為地產商用公帑造好基建、把土地全面金融化的搶地運動,秏盡財政儲備,把香港人封死在幾條做樓奴的死路之中,就是我見到的「CY 禍港5年」。要拆開「發展房屋(地產+中港任務) vs 保育」的假對立,方法和方向就只有一個,就係貨真價實的民主。知情權的開放,制度上的權力分配,意識上要參與和改變的「民主」。

所以睇完 JT 政綱,對於一旦 JT 上台,香港變好的夢想,他和 Carrie 的分別有多大,恕我感受不到。但社會始終是由媒體和公關主導論述。甚麼是 D?總之現在個社會就叫你唔好諗 D。ABC 就是 ABC,如果有別的議程?收皮,請便。這種無處可逃的恐懼與憂鬱,一瀉如注的洩忿政治,在表面浮來浮去的公關騷,實在令人好心酸。

D 可以係啲咩,應該係啲咩,幾時都可以傾,但自限於 ABC,則很可能是錯重點。除非……大家真心覺得 ABC 可以通向 D。

 

作者 facebook

發表意見