立場新聞 Stand News

Disturb the Sound of Silence

2017/2/1 — 11:29

曾俊華、林鄭月娥、葉劉淑儀、胡國興

曾俊華、林鄭月娥、葉劉淑儀、胡國興

兩名「大熱」落場開跑唔夠兩個禮拜,高下立見。

數字2.0真係露曬底,不才都唔計佢無時無刻放暗箭啲卑鄙嘢,同埋佢啲離地戇居嘢,齋睇佢成個選舉”campagin”,就已經係土炮到分分鐘連啲學生哥去競選學生會都好過佢。

競選網站曾將”Campaign”串錯成”Campagin”。(來源:《蘋果日報》動新聞片段)

競選網站曾將”Campaign”串錯成”Campagin”。(來源:《蘋果日報》動新聞片段)

廣告

依家嘅數字2.0,只係喺度充緊大頭鬼,情形同數字1.0喺舊年被宣布要照顧家庭之前充到好似必定連任咁款,係一模一樣。據講佢會喺初七搞造勢大會,不才等睇好戲。除咗睇吓嗰位唔知陳生姓乜嘅老人家係咪會上台同佢攬攬,不才最想睇嘅,係究竟到時會有邊啲社會精英賢達肯露面黐埋佢度幫佢站台。不過,佢好嘢,揀咗個立法會議員唔得閒出席嘅日子嚟造勢,有借口呢批人嚟唔到,如果唔係,大家幫嗰班出嚟站台嘅建制派奴才議員全部cap曬圖,遲啲佢哋轉軚,重好睇。

廣告

鬍子叔叔呢邊,果然係學過功夫,出招快且準。一見呀唔得掂走出嚟宣布全面重推小三TSA,即刻食住個勢公布佢第一項政綱,建議取消TSA,擺明望住對面陣營最弱嘅部位嚟打。呢招,即刻贏曬,唔只贏到家長撐佢,連小學生都話想佢做特首。

真係唔好睇少鬍子叔叔吸民氣嘅能力,佢會係老中青幼通殺。鬍子叔叔之前已經識得善用social media兼且會由後生仔嘅角度講嘢,吸咗好多八、九十後嘅likes,依家連細路仔嘅都吸,重有,鬍子叔叔本身講嘢比較慢聲線比較沉,佢同長者嘅feel其實係好夾,佢重有個殺食嘅慈祥爺爺形象,唔係講笑,遲啲佢再向長者出招,一定可以霖盡香港嘅公公婆婆。

鬍子叔叔喺呢個零星期嘅表現,包括佢喺彭博嘅訪問,同埋趁赤口分享應節歌曲嘅po,都向大眾顯示到,佢對於社會問題嘅睇法算係比較有深度,個人亦都比較有品味、有風度,起碼似番一個國際大都會嘅呀頭應該有嘅水平。

曾俊華 facebook 截圖

曾俊華 facebook 截圖

不才嘅分析一直認為鬍子叔叔會係香港下屆特首,眼前數字2.0嘅假強勢只係習某刻意任由西環亂搞所營造出嚟嘅煙幕。不才唔太擔心今次特首選戰最後會整咗個greater evil出嚟,不才最關心嘅,係香港撐民主嘅人可以點樣喺呢個選戰沙蟹局入面,凝聚能量,唔好中伏,毋忘初衷,要換人,亦要換制度。

之前有讀者朋友留言問,可以點先唔俾人呃,我哋重有乜野可以做。

除咗keep住去揭穿數字2.0嘅假面具之外,不才認為,我哋依家要一齊disturb the sound of silence.

依家喺撐民主嘅陣營裡面,好似分咗兩大派,一派撐鬍子叔叔,另一派就覺得佢都係建制嘅人絕對唔會撐佢。不才就認為,其實邊派都好,兩邊可以一齊做,一齊disturb佢。

撐鬍子叔叔嘅朋友,唔好淨係喺佢FB度俾like,喺街度撞到鬍子叔叔亦唔好淨係掛住同佢selfie然後對佢講句:「加油呀!」要講加油,不如咁講啦:「加油呀!鬍子叔叔。你一定要贏呀!跟住呢幾年,你要加油幫香港實現到真普選呀!」鬍子叔叔話佢會喺條光纖隧道入面睇到牆上嘅塗鴉,咁,如果你係撐佢相信佢嘅,就更加要將香港人反對8.31、要求真普選嘅訴求,喺佢個FB page度大大力咁畫落去,大大聲咁講出去,千祈唔好放過呢個機會。情形就好似你對你公司個夾心人呀頭咁,你有無遇過或者自己做過呀?你公司個大老闆整埋啲無良政策,搞到你個department天怒人怨,你嘅呀頭係好人一個,但佢又未至於會走去同大老闆反曬檯咁幫你哋出頭,咁你會點?如果你相信你呀頭,咁你個department嘅同事就要一齊好冷靜有禮貌但係好鮮明咁將你哋對嗰啲無良政策嘅不滿一五一十咁講曬出嚟,猛咁去呻吓啲政策搞到你哋無曬士氣呀,搞到一個二個都唔想再咁搏命幫公司去湊客呀,諸如此類,諸如此類。咁你個好人呀頭,做得夾心人呢份衰工咯,就係預咗要執呢啲蘇州屎架啦,如果你哋成班靚死狗咁受曬嗰啲無良政策,聲都唔聲吓,你個呀頭就算真係想遲啲幫你哋搵老細斟都無彈藥啦,係咪?

至於認為鬍子叔叔屬於建制派始終係聽北京話所以絕對唔撐佢嘅朋友,咪多啲喺佢個page度留言,對佢講我哋係唔會接受8.31個爛框架囉,大家重可以喺佢FB度警告佢,叫佢千祈唔好諗住扮數字1.0咁選前選後兩個樣,甚至嚇吓佢,話如果佢第日選到就變咗數字N.0,咁到時我哋就必定會用狠過依家對數字1.0 N倍嘅力度奉還俾佢,諸如此類,諸如此類。咁大家依家又唔駛用啲臭罵鬍子叔叔人格呀動機呀嗰啲咁嘅留言方式嘅,無謂又同撐佢嘅人惹起好無聊嘅罵戰,製造自己人內部分化,唔值吖。

除咗繼續講要求無篩選嘅選舉制度之外,不才認為,大家不妨集中講吓要求加快立法會直選比例,同埋講一啲對保障言論同新聞自由比較關鍵嘅嘢,例如反對網絡23條、要求政府新聞處開放俾網媒採訪、取消特首校監必然制等等,呢啲,對於保障香港嘅公民社會能夠繼續監察政府,同佢抗衡,係好重要。

香港人要一齊disturb the sound of silence,重有一個平台,就係依家出面搞緊嘅特首選舉民間投票。不才認為搞呢檔嘢,係民主陣營喺呢個沙蟹局人面非常聰明嘅一步,攞番個話語權,唔好俾習某同埋成班建制奴才牽住鼻子走。

不才睇網上講呢個民間公投,係玩正負值,加插埋逆向投票,呢下正。尤其係喺呢個俾建制操控嘅選舉入面,呢個負值,就係一面照妖鏡,如果將來個選委會真係揀咗個負值嘅greater evil甚至greatest evil出嚟,咁香港人喺佢當選之後湧上街或者喺網絡度一齊熱烈招呼佢,就更加出師有名,嗰位未上任先負皮嘅特首,任期壽命大有可能比數字1.0更短。

網上話呢個公投重有一part會問啲議決題目,俾市民表達對依家特首選舉制度嘅意向。不才唔知係會點樣問法,估計應該會講埋8.31框架掛。不才認為,整埋呢part係超好嘅設計,因為即使我哋改變唔到呢屆嘅選舉制度,拎住嗰三百幾票亦唔會有能力要求到一個有機會贏嘅候選人將「推翻8.31」呢啲咁爆嘅嘢寫入個政綱度,但係,今屆變唔到,跟住呢兩、三年都一定要爭取到下屆變,如果唔係,就算呢屆出到鬍子叔叔呢個lesser evil,下屆佢七十歲,重連唔連任?唔通,五年後香港人又要再膽顫心驚等運到,睇吓到時大陸邊派勢力要擁邊隻魔鬼出嚟呀?咪喇掛。

爭取真普選,個戰幔已經再次揭開架喇。依家唔講,更待何時呀各位!我哋呢大批兩年幾前喺街頭dare disturb the sound of silence嘅香港人,呢舖,一定要繼續企出嚟,重要叫埋曬啲親朋戚友企出嚟,去留言,去投票,直至有日我哋香港人要有真普選嘅聲音唔會只係like silent raindrops fall and echo in the wells of silence.

 

 

發表意見