立場新聞 Stand News

Hong Kong is China — 而家做到喇

2018/11/16 — 12:24

美國國會美中經濟與安全審查委員會提交最新報告話北京不斷侵蝕香港自治權、打擊香港言論自由,建議重新評估應否繼續將香港同大陸視為兩個單獨關稅區。呢次求仁得仁喇,不斷將香港嘅法治人權剝奪到同大陸接軌,而家美國就當你香港係中國一部分。嗰幾萬億經香港嘅出口,遲早冇㗎喇,啲外國傳媒、國際投資者同企業,寧願去新加坡喇,香港人負資產燒炭都要支持國家呀。

林鄭月娥話美國「帶有色眼鏡去睇香港同中央關係」。

湯家驊話「到了今天,我們實在應撫心自問,究竟我們希望『一國兩制』成功還是失敗?如果希望成功為何要每天自毀長城,令所有人均認為『一國兩制』是失敗的?」。

廣告

自由黨鍾國斌話如果美國「當香港係中國其中一個普通城市,香港可以話玩完」。

你地班粉皮又唔問究竟點解全世界都覺得香港已經唔係一國兩制?係邊個搞成香港咁?點解香港人會被洗頭艇劫番大陸?邊個搞外國記者會 FCC?邊個驅逐外國記者?你好搞唔搞搞外國記者?仲有呀,香港個司法制度搞成點?點解香港政府會違法剝奪公民參選資格?點解人大可以今日釋法宣佈民選議員昨天嘅宣誓冇效再褫奪議席?點解 UGL 不了了之?點解基本法寫嘅普選會冇咗?

廣告

不過呢,香港作為中華人民共和國自古以來神聖不可侵犯嘅一部份,呢個時候變成中國城市,共赴國難喇,理論上應該表揚啦,邊個要求香港獨立關稅區,根本就係搞香港獨立!根本就係暗獨!係民族罪人!

都係工聯會陸頌雄夠愛國喇,佢話「唔需要美國人施捨」、「唔係美國人嘅恩賜」,「獨立關稅區係我哋《基本法》116 條規定,亦係國際認可,香港亦以獨立關稅區身份參與國際經貿組織」。

雖然佢個講法弱智得很,美國人決定收邊個地區乜嘢關稅,呢個明明係美國內政,但佢勝在政治過硬。到時香港有咩事,啲人失業負資產俾銀行收樓破產燒炭,陸頌雄記住要幫大家呀。

 

作者 Medium

發表意見