立場新聞 Stand News

Humpty Dumpty

2015/5/11 — 7:52

財政司司長曾俊華出席記協周年晚會

財政司司長曾俊華出席記協周年晚會

一早批死高官落區宣傳政改,越campaign支持袋住先就越跌,三間大學合辦民調上星期公佈最新結果,支持袋住先比率跌至44.4%,反對則升至39.1%。是調查以來最低的支持比率,支持淨值亦由13.8%的高位,跌至5.3%。調查期間冇重大事件發生,只係有689美孚送蜜糖「潤」林鄭,大媽跳《小蘋果》舞、「離地On車」巡遊、「民望高」爆seed,女茶客淡定KO陳智思,講完。

今屆政府乜都有,就係冇呢三個字:「自知之明」,一個低民望特首帶住一棚業餘政客,學人搞政治鬥爭,叫人對付反對政改的泛民「vote them out」,林鄭落麗閣邨拍住工聯會區議會候選人派傳單,連馮檢基都要反擊指政改宣傳實際是政府聯合建制派競選工程。政府主動將政改宣傳變成左派政黨地區選舉宣傳,實乃自己捉蟲。

以往港英有效管治,是一直有意識地維持超越本土政治的地位,高於政黨,建立政黨以外的精英建制力量。由於冇明顯黨派色彩,才有所謂「獅子山下精神」搵食大過天的沉默大多數佔據主流。呢班人唔係讀書少或基層,反而不少是中產、小白領,呢班人信任公務員體系,崇尚權威又白鴿眼,重大事件會選擇跟隨政府,由此成為香港政治秩序穩定嘅基礎。昔日港英建制如李家祥、梁智鴻、夏佳理、張建東等出來sale政策,冇明顯黨派政治色彩,又有一定專業地位,故此在輿論巿場上能成功壓制民主派訴求,這就是英治時代「目標為本務實至上」的管治哲學,至於過程如何並不重要。反觀今日特區管治騎呢業餘,由政改宣傳可見一斑。689及林鄭等人,只求過程政治正確,不理客觀效果,咁就出事。政改係要泛民支持,而關鍵係爭取泛民群眾改變態度,你群埋一班左派在社區宣傳,由周融、劉江華、身穿競選背心嘅工聯會民建聯人士叫泛民支持者轉軚?一係有病,一係就根本想「搞彎」。市民明明個心想袋住先,一見到建制派遞張傳單過來就掉頭走。

廣告

大家諗一諗,鬍鬚曾一樣經常發表撐袋住先言論,一樣明寸暗諷泛民,但就少有受傳媒及泛民攻擊,正因為佢冇黨派陣味,似昔日超越政黨嘅AO Style,另外就係論政能力,唔係靠嗌口號大媽廣場舞及白癡論述。上周五晚佢出席「反動」團體記協籌款晚會做嘉賓,上台講政改,大家當然廣傳佢抽馮煒光及高永文水那兩段,為大家消消氣。但佢最重要一段演說係由自己被蛋掟中開始,講到社運界神級金句「村上春樹雞蛋與高牆」比喻,然後最終帶出《愛麗絲夢遊仙境》中蛋頭Humpty Dumpty由牆頭失足跌死的故事,此乃高水平以幽默風趣方式反擊社運人士及泛民,而非689「vote them out」惡形惡相。如果按照今日特區「政治正確」、壁壘分明,只問過程不問結果的標準,官員根本就唔應該去記協活動,只應該撐「自己人」周融簽名活動。

香港人政治意識不斷進步,奈何政治圈卻不斷倒退,政治論述水平低但又惡形惡相,仲冇自知之明,2017,一定死得!

廣告

發表意見