立場新聞 Stand News

JT愈hea愈好

2017/3/24 — 17:17

3月24日,曾俊華於港島區巡遊並與市民自拍

3月24日,曾俊華於港島區巡遊並與市民自拍

冷靜啲,無論你撐咩都好,其實我哋無人有票嘅。

但假設如果有得揀,我會揀薯片嘅。點解?

首先,我唔buy「薯片先係底牌」論。薯片底牌論有個前設,係所謂「中央」,有習路線同非習路線,而薯片實際上係習之選,林鄭係中聯辦張德江嘅人,甚至只係煙幕。

廣告

問題係,中共而家其實無兩條路線,只有習核心,左手打右手之說其實唔通。

廣告

大膽假設全部都係一個局,利用香港人逆反心態暗捧薯片,咁呢場假戲也未免太迫真。迫真到薯片被人打成勾結反對派,勾連外國勢力,同中央對著幹。

薯片底牌論,好難講得通。

就退一萬步,假設最終贏嘅係薯片,林鄭倒灶,都有好處。

其一,原來「中央」真係有兩條路線,打個不亦樂乎,敵人內鬥,我哋就有位走。

其二,鬥倒中聯辦,土共勢力又洗牌,梁振英之流鐵定被清算,睇人仆街最開心。

其三,就算萬事不論,林鄭同JT,都係揀JT。如外界所言,林鄭能幹,JT hea,大家都有啲任務要做,例如23條,林鄭愈能幹傷害愈大,JT愈hea愈好。

唔好唔記得,JT仲承諾過白紙草案。

有論指,如果今日要less evil,當日何需佔領,何需否決831。

呢個其實係邏輯錯誤,否決831,係對篩選方案說不,今日less evil,係政治現實下嘅策略選項,格硬拎埋嚟比較係無意思。

重要嘢放最底,最令人難過,其實唔係撐唔撐薯片,而係「民主派」內鬥又多個理由。

我話你班薯粉白痴,你話我原則撚弱智。其實策略也好原則也好,從無咗梁振英abc消失後,民主派點都兩難,原則同務實,你岩佢亦無錯,何苦哭喪咁聲怨天怨地,或者互吐口水吊晒鬼?

幾個月前有個血淋淋嘅教訓,個教訓叫本土派,不斷話人港豬屌票,只會令自己愈來愈孤立,令本來嘅同路人愈走愈遠,請不要重蹈覆轍。

 

(標題為編輯所擬;原刊於作者 facebook

發表意見