立場新聞 Stand News

TSA鬥爭寸步不能讓 

2015/11/9 — 8:02

教育局局長吳克儉(資料圖片)

教育局局長吳克儉(資料圖片)

預計反TSA將會越搞越大煲,2012年7月反國教運動至今三年有多,呢班人完全冇得到任何教訓,一味以為死拖爛拖,等過咗選舉就會淡埋。行會張志剛解讀為泛民食過翻尋味,在區選前翻炒反國教運動作競選議題,判斷錯晒,同當年反國教進退失據如出一轍。

梁振英及其親信恍如生存在上一個世紀八十年代,沿用一套老左毛毒政治陰謀論,認定本土民主運動及社運,背後必有政治勢力、政黨及外國勢力策劃,呢種講法正好投北京所好,表面睇似層層內裏反智。尤其近十年自八十後社運抬頭,由天星、皇后保育一路殺到反高鐵、菜園村到東北社運,是自發的新社會運動,泛民完全冇領導,只係跟住形勢去抽水。反國教初起,學民思潮甚麼組織、黃之鋒係乜水,689落屯門搞諮詢會,學民突擊會場舉牌,記者仲問呢班中學生係乜嘢人。真正鬧大係政府官員無能,拖到家長都企出嚟,形勢先不可收拾,至於所謂泛民政治黑手,根本就落後形勢,記得當初教協係支持國教。

家長對TSA不滿是政策執行問題,學校是病源,根本就大把空間去調整。但在政府眼中卻無端變成了寸步不讓,退一步將令區選形勢逆轉的生死對決,我們只能講句:「夠鐘食藥。」呢種政治鬥爭邏輯,會捕風捉影,憑空羅織成政治大陰謀。689十分欣賞的偉大領袖毛澤東一邊吟詩寫詞,一邊度橋整死革命同志,同樣愛捕風捉影,認為同志受蘇聯外國勢力操縱。毛毒入腦,後果是小事化大,大事變危機,三年來冇停過。只要對區選稍微有認識都知道係鬥勤力,鬥蛇齋餅糭,絕對唔會有人低能到用教育做選舉議題。

廣告

如此政策爭議會不斷升級,有兩個特別原因,第一是局長吳克儉無能,官場皆知,除鍾意出訪遊埠外,亦喜歡去酒會,但就唔多想返政總辦公室,據說教育局常秘經常在開會期間當面窒佢,一條廢柴又何來政治能量去擺平TSA,於是惟有閃,口中念念有詞「你睇我唔到、你睇我唔到」,以為咁就冇人見到佢。

第二是現屆政府用鬥爭方式管治社會,港英年代但凡有政策爭議,政府官員都會採取低調,幕後傾掂數,將件事升呢對自己冇好處。𠵱家就正好相反,一開波就從政治角度入手,拉高矛盾,逼中間歸邊,然後就孤立反對者,開動宣傳機器打殘對方,於是大家惟有攬炒。

廣告

特區政治之令人厭惡,係政府管治水平低,三年半以來仲以為自己未掌權,一味諉過於人;如傳媒太自由、反對派凡事政治化、法官唔聽點、英美勢力猖狂,諸如此類。上次反國教,仲有林鄭做奶媽,一方面拍住吳克儉,另一方面穩定形勢,但如今林鄭無求膽自大,頻頻爆seed亂噏,相信係扮儍免被689視為連任對手而追殺,反TSA如果真係被視為寸步不讓之敵我矛盾鬥爭,莫講話林鄭閃開,政府內部冇其他人願意沾手,當梁粉們紛紛披掛上陣,殺氣騰騰,與他們心目中的反對派死敵對決,結果只有令反TSA運動聲勢更加浩大。

香港管治失效,沒有糾錯迹象,仲越來越癲。

 

原刊於蘋果日報

發表意見