立場新聞 Stand News

UGL變國家領導人軟肋 689焦慮不安

2017/5/22 — 7:11

梁振英

梁振英

林鄭組班消息滿天,港澳辦主任王光亞來港,相信是為此埋尾。

由於689將政局有咁爛搞咁爛,UGL事件赤膊上陣對付梁繼昌,死咬唔放,好多人都唔明佢搞邊科,其實一字咁淺,就係「拆爛污」,即係四處大便攪亂檔,五年來都係呢條橋,拉高政治矛盾,逼所有人歸邊。對689而言,最大的恐懼是新政府重回正軌,佢希望林鄭對UGL事件永不翻案。當年老毛晚年不就是以為扶植華國鋒,可以保住四人幫、保住文革路線,希望鄧小平永不翻案嗎?

當日一手扶689登基之勢力,這五年來挑起港獨運動,就係為咗令佢再做五年,點知被習近平DQ了,惟有變陣,以為擺個「華國鋒」當下任特首,689 2.0、3.0、4.0就可以一直落去。大家事前有否想過立法會那壇冇牙老虎UGL調查委員會,會一鼎激起千重浪?689被扶上國家領導人,八面威風當上政協副主席,之後大灣區考察大龍鳳,擺明做太上皇,有乜好怕?就是怕委會搞出其他未為媒體報道和公眾知悉的違法行為,所以動用私人訴訟對付梁繼昌,赤膊上陣日日叫委員會趕佢走,如此焦急恐怕不會為了「程序公正」吧?這四個字出自689之口,太荒謬!目的是想殺雞儆猴,希望其他委員收聲。

廣告

面對冇牙老虎,西環及689仍高度戒備,兩大契仔謝偉俊任主席、周浩鼎任副主席,建制派佔多數,又動用唔到特權法,搞唔出乜嘢花樣,但仍然以獅子撲兔之勢封殺?很簡單,當日力撐689當上國家領導人的,當然有中聯辦份,而共產黨內亦有規矩,問清楚689究竟會否被刑事起訴,相信梁愛詩、袁國強等人也應該就此向中央表達意見,ICAC行動處可以放軟手腳、李寶蘭可以搞定。689當上政協副主席,當然在共產黨眼中UGL事件是過了關。但福兮禍所倚、禍兮福所歸,做了國家領導人但UGL還留低立法會呢條尾。由此去睇「浩鼎門」來龍去脈就一清二楚,早前西環系統之容海恩也在委員會內提出過十分類似的修改意見,大家都一頭霧水,唔知佢做乜。一計不成又生一計,今次由689改好份文件再以周浩鼎名義提交,點知陰差陽錯,就壞在一個又蠢又懶的西環契仔手上。

林鄭唔想做華國鋒

廣告

泛民準備6月動議彈劾689,在政治姿態而言,為七一吹雞上街有幫助,但實際工作都係在調查委員會內,泛民議員應由幾位前議員,如余若薇、梁家傑、何俊仁等組成影子調查委員會,向公眾提供調查的重點、提問追問方向,必要時搵外國媒體幫手。

由任命下任財政司長一職的角力可見,西環力挺陳茂波,以延續689影響力當太上皇,但林鄭提名政治形象較中立的歐陽伯權,明顯佢都想擺脫6892.0之污名,唔想做「華國鋒」,UGL是否真的可以永不翻案?看來689也無把握,所以先至有「浩鼎門」,這麼簡單的道理,泛民還看不出?林鄭正逐個泛民黨派見面,每個見完都為林鄭講好話,至少唔會惡言相向,689看在眼裏,定必焦慮不安。UGL成為國家領導人的軟肋,當初邊個估到!

 

(原文刊蘋果)

發表意見