立場新聞 Stand News

Vasco, you are more dumb-ass than your 毅進 boys!

2019/9/28 — 19:54

韋華高(Vasco Gareth Llewellyn Williams,圖左,立場新聞圖片)

韋華高(Vasco Gareth Llewellyn Williams,圖左,立場新聞圖片)

【文:黃小堅】

最近光頭時沙劉 Sir 以一張在葵芳巴士總站擎槍指向「暴徒」嘅相片瘋魔中國大陸,官媒爭相報導,鋒頭尤勝不少為保存大陸搵米機會而埋沒良心嘅香港藝人,劉 Sir 更獲邀出席 10.1 國慶典禮,使一眾藍絲和同袍亢奮不已,也為所有光頭神探吐氣揚眉。

俗語有云:樹大有枯枝,族大有乞兒。勢想唔到突然殺出一位光頭十,把一眾光頭神探嘅臉丟盡。這位仁兄就是月薪過 10 萬嘅新界北區總指揮韋華高總警司(Vasco Gareth Llewellyn Williams)。他在 9.22 嘅警方記者招待會一炮而紅,馬上成為 talk of the town。韋 Sir 之所以在記招上綻放異彩,備受公眾青睞,係因為佢犯咗五宗罪。

廣告

第一宗罪:他視力不合格。當場內外大多數人看過元朗後巷黃衣人被速龍圍毆嘅視頻,都清楚睇到嗰堆嘢係人,但韋 Sir 卻堅持視頻不清晰,他睇唔出個件係人。咁都幾肯定他嘅視力有嚴重問題啦!不過唔知點解,佢唔學隔籬嘅江 Sir、李 Sir 帶番副眼鏡,咪乜都睇到啦。視力咁差又當差,點開槍驅散暴徒呢?分分鐘搞出人命就大劑了!

第二宗罪:曲線鬧下屬。擁有大學學位嘅韋 Sir 叫黃衣人做 yellow object,仲加多句:可能是 yellow bag。翌日,香港好多中小學生英文大有進步,拉人鏈時,掛牌叫自己做 green object。他自以為好醒嘅描述卻出賣咗自己嘅無知。如果只係一個 yellow bag 而已,市民大眾感到萬分困惑,點解眾多肌肉發達手持武器的男子漢,唔去拉暴徒,卻浪費時間同精力,傻更更圍住一個 yellow bag 嚟踢?韋 Sir 係唔係曲線鬧佢嘅手下 stupid 呢?

廣告

第三宗罪:出賣下屬。韋 Sir 承認有警員踢 yellow bag,但我地好唔明白點解韋 Sir 會自動獻身,承認下屬踢 yellow object?假若日後證明 yellow object 就是黃衣義工,那豈不是不打自招嗎?咁韋 Sir 係唔係出賣咗下屬呢?

第四宗罪:缺乏本土知識。韋 Sir 由英來港當差二十多年,竟然唔認識香港的特產 — 香港腳。有關視頻顯示被踢後,嗰個 yellow bag 竟然郁都唔郁下,何解?唔通極打得嘅速龍會腳軟,連一個 yellow bag 都踢唔郁?韋 Sir 竟然唔識幫下屬解畫?據報導,韋 Sir 在九十年代加入警隊,廣東話粗口流利程度肯定勝過北角名園西街福建黨員幾條街,但筆者估佢衰在不屑認識本土文化特產,例如名震中外的「香港腳」,所以唔識話:下屬要係後巷集體踢 yellow object,係因為當更時間長,工作壓力大,仲要成日 full gear,以致香港腳發作,又唔記得帶「歐家全」、「愛膚堅」等土炮特效藥,以致隻腳痕癢難耐,不受控制,一切純屬「自然反應」,並非蓄意踢嘢!尤記得當年「愛膚堅」廣告裡面嘅的士司機都識得用嚟過橋啦!

第五宗罪:綜合以上各點,佢明藍實黃。韋 Sir 喺數近百萬觀眾睇著直播警招會時,暗裏譏諷下屬 stupid。加上本土意識薄弱,唔識用「香港腳」解畫。於是訴諸「理性」,反問在場記者,後巷一眾男子漢會蠢到打犯嗎?有記者馬上提醒他「暗角七人組」毆打曾健超事,韋 Sir 即時大番記者轉頭話:嗰單係五年前的事。點知新視頻曝光,證實 yellow object 係人,唔係 yellow bag,速龍踢瞓係地嘅黃衣人不只一次,眾師兄斷正!咁即係順便括埋韋 Sir 一大巴,證實佢嘅下屬真係 stupid!唔通當差廿多年,對下屬係乜嘢貨色都唔知咩?抑或,借機會講出心底話?

面對咁笨蛋窩囊嘅上司,一眾男子漢應該 high 上腦,因為下次當佢地被黑衣暴徒恥笑為「毅進仔」、「智障仔」時,佢地可以大聲話:「我地高 B 過總警司阿韋 Sir 好多!」

發表意見