立場新聞 Stand News

毅行新手貼士

2016/10/27 — 9:42

毅行先生陳國強最鍾意講:四人八腿一條心,行到終點開香檳!圖:KK Facebook

毅行先生陳國強最鍾意講:四人八腿一條心,行到終點開香檳!圖:KK Facebook

秋風起,又是行山活動季節。有位朋友熱血上腦,忽然毅行,問我要注意什麼。我曾經行過三次毅行者,參與籌辦活動八年,以自己的經驗加上一些前輩的提點,第一次參加的朋友可以略作參考。 100 公里好長,但只要有决心,一定可以行到終點,參加者要有心理準備受傷同辛苦係一定會發生,練得多就受傷少的、無咁辛苦,練得唔夠狀態唔好就捱得辛苦的,但一隊四個人在毅行路上發展的友誼係會好長久的,因為你們會共同擁有一段狂喜、痛苦、掙扎的寶貴經歷,無參加過的人係唔會明白呢尐「毅星人」的語言。

毅行者在 11 月舉行,參加者應該練得不錯了,以下是一些訓練體能以外的個人分享,絕對不科學,只係個人經驗:

- 活動前一星期剪腳甲,否則落山會撞黑腳趾(尤其腳趾公),好多人行完毅行,會成塊趾甲甩出來好恐怖。但不要待到最後一日才剪,指甲邊的肉需要時間適應才能再保護腳趾。

廣告

- 我行毅行者、去尼泊爾、內地長途步行都無出過水泡,全靠著兩對襪(不要厚襪),裡面係吸汗、外面係避震,每次大休息就換襪,先穿乾淨襪、原本裡面嗰對做外面,外面一對換走,你會發覺外面對襪會薄左好多,棉線已被壓得又乾又硬 ,只穿厚襪就腳板直接接觸變硬了的襪,都會易出水泡。有些朋友會著腳趾襪、搽潤膚露減低腳趾間磨擦,但我個人不喜歡。

- 如果在休息時發現初起水泡,可以用濃鹽水浸泡一陣,有助舒緩。如已成形隱約見到白色證明已經有水在內,就消毒刺穿水泡貼膠布。刺穿水泡與否時時都有人拗,無一個定論,根據隊友經驗,有水泡而繼續,只會一步一痛,有些人會選擇耐心忍耐,好快就會痛到盡頭忘掉痛⋯⋯刺穿水泡你可以預期一兩小時後會無感覺。

廣告

-活動期間食得太多、太飽都會令肚腩仔感覺好重,而且好快要「開大」,雖然檢查站有厠所,但行到腳軟時,大事都係少做為妙,最好食七分飽無肚餓感就停。行得耐胃口多數較平常差,青瓜壽司、鹽焗小薯,蕃茄薯仔湯飯都不錯,一碗中式糖水如木瓜雪梨雪耳可以補充糖份及滋潤秋天的乾燥。如非平日有大量食用奶類食物的習慣,活動期間避免進食有奶類、椰汁、 牛油的食物,長途步行的人特別易肚瀉,奶類製品可免則免。沿路帶點水果,在少許肚餓或心情低落時食用,小蘋果、雪梨、或橙肉(入小盒,免除要在山上處理果核)都非常適合。所有跑步、行山的活動中大會必然提供香蕉,香蕉熱量高及含有豐富的碳水化合物,可作為身體燃料的補給,但亦會易令人肚瀉,視乎個人在練習行山時有無食香蕉習慣。如沿途不帶食物,去到檢查站會太肚餓變成食得過多。

-Warm Up 出發前好多人會做,其實 cool down 更緊要,小休時盡量拉筋,尤其是頸兩側、膊頭、小腿及腳板底。

- 長期步行,膊頭、後腰會好攰、痠痛。在檢查站大休息時置大毛巾在地上,面向下、大字形休息五分鐘可以舒緩腰背壓力,初時不習慣會覺得好痠痛,兩分鐘後身體會自然地慢慢郁動改變姿勢,調節到一個最舒服的位置。

-水當然要飲到夠,已故勞永樂醫生常常提醒參加者要飲到有便意至啱,當你感到頸渴,其實已經缺水,長時間缺水,肌肉會更快攰。

- 跑得快的隊伍一件衫去到尾,普通人就換衫舒服的、精神的。可以預先計劃好不同檢查站要更換的衣服,分開袋好方便支援隊帶到檢查站。女士著Bra濕哂更辛苦,盡量換。夜晚上山要加風褸,一來山上大風,夜間溫度下降,凌晨有露水,只著濕衫好易會傷風,流鼻水就會影響步行不能平均地做呼吸。

-除非計劃 40 小時以上完成,否則盡量唔好過兩個夜晚,日出好靚但見兩次就大鑊,所以大休時想瞓覺都唔好多過半小時,否則起身後意志會好薄弱。休息太耐肌肉亦會易酸痛,必需多做拉筋才起行。

- 好多人步行長時間後膝頭前面條筋會好痛,香港理工大學康復治療科學系楊世模及楊慧教授教導半蹲的姿勢最能訓練呢部分,每日刷牙洗面睇電視都半蹲就隨時都練到啦。另一個方法係行樓梯,對鍛鍊提起膝頭同大腿肌肉好快見效,我當年就係每日返工、食晏行 15 層樓梯上辦公室,由喘氣練到輕鬆完成。

行 100 公里或長途賽事, 心態比體能重要,每一個有决心完成的人都應該可以做到。 四人同行,非常訓練身心挑戰友誼,但無論訓練得幾好,活動日都會有意外,需要重新調節計劃 。

毅行先生陳國強最鍾意講:四人八腿一條心,行到終點開香檳!祝各位新手都能平安無事,齊齊整整手牽手一齊到達終點。

發表意見