立場新聞 Stand News

渣馬用特步 香港超馬用Skechers

2015/1/29 — 20:00

博友高達奔上周片特步,還以為香港跑友一定一呼百應,你問我揀Nike定係揀李寧;揀iphone定係揀小米,呢個問題根本唔需要諗。雖然唔鍾意特步的跑友係好多,但勢估唔到都有本地跑友認為,反正香港人係食梅林牌午餐肉大、鉛筆用慣中華牌,點解要因為特步係大陸牌就要反?New Balance咪一樣係大陸生產!

似乎特步贊助渣馬真係幾有效,已經開始搵到些粉絲,特步應該要考慮來香港開分店。有這一群對品牌無所謂的跑友,討厭特步的跑友,恐怕難以用消費者的力量逼渣馬棄用特步了。

品牌有價,外國品牌贊助的疏爽程度,肯定唔及強國牌。據江湖消息流傳,強國牌唔單止送每一件Tee,仲有現兜兜的現金贊助,條件好過晒其他外國牌子,所以渣馬情願選用檔次較低、形像較差的特步。當然,多了的贊助金額是否用在比賽?是否用在跑友身上?還是去了田總的荷包?這就無從稽考了。

廣告

但也不是所有新比賽,都為了贊助額而投向強國牌、李寧或特步的懷抱。超馬會的經驗話你知,有些賽會係有要求,唔係純粹用價高者得、捨難取易來衡量找誰來贊助。

超馬會找到Skechers作為贊助品牌,包括贊助由毅行教室的消防員陳國強訓練的香港精神隊,以及於一月三十、三十一日舉行的第一屆24小時超馬賽。每個參加者,唔喺送一件Tee,而係送一對跑鞋!

廣告

賽事在大埔白石角海濱長廊舉行,每圈一公里長,由早上11時開始繞圈跑。據超馬會秘書長朱鼎良說,參加24小時賽的男女跑手,只要揀對Go ride 3/Go Run Ultra著住跑三圈,呢對鞋就送畀你的。

Skechers這兩三年在香港開了不少分店,亦有贊助一個10公里的夜跑。若讀者有印像,我去年寫過一篇,題為Skechers跑贏Nike的文章,談及Skechers近年的股價走勢凌厲,2014年首季正式爬過老牌子New Balance頭,成為美國第五大的跑鞋暢銷牌子。

近年來Skechers最佳靚抽,就是冷手執個熱煎堆,簽下了美國名將Meb Keflezighi(文首圖)。2010年Nike嫌Meb年事已高,過了運動員顛峰,只願意開一個極差的條件跟他續約,Meb當然不願委曲接受。終於在七個月,Skechers簽下這位人棄我取的老兵,隨後該公司設計隊詳細訪問Meb,了解他對跑鞋每一部分的要求,依樣劃葫蘆設計了第一對跑鞋。換了跑鞋並不影響Meb的表現,他贏了2012年美國奧運馬拉松選拔賽,並於同年的倫敦奧運會奪第四名,勝出波馬更是攀上他職業生涯的最高峰,為美國重奪失落了31年的波馬冠軍,也帶挈Skechers 的股價水漲船高。

簽了Meb之後,Skechers於去年把美國的精英女跑手Kara Goucher收進旗下。成功轉型後的Skechers,不只是休閒鞋的品牌,也是最頂尖精英選用的牌子。

PS:回到香港的超馬賽。可惜,沒有能耐跑24小時的我,與以下這堆Skechers鞋無緣了…

發表意見