立場新聞 Stand News

HK100 參加者心聲

2016/1/25 — 11:12

HK100 是華洋夫婦 Steve 和 Janet 搞的 100 公里山賽,短短幾年由小比賽發展都成國際山界知名的比賽,是 UltraTrail World Tour 世界巡迴賽香港站的第一站,每年一月舉行。

比賽成績計算到當年個人世界排名,所以吸引了好多頂尖外國跑手參加,本地跑友沒有咁上下實力都唔敢報的,但都要抽籤才可以參加,唔係即時興起趁冬就跑的山寨賽。

大帽山上的傷者不是兒戲的「行山人仕」,這 HK100 是一個港人引以為傲,跑手對搞手和義工無盡感激的國際山野超級馬拉松,落場選手由香港精英到世界冠軍都有。

廣告

引述一位參賽者、一位經驗越野跑者的看法,給大家參考:

一.Kim Wai

廣告

琴日我都有參賽,作為跑者我都想幫主辨單位講幾句說話:

  1. 其實琴晚天氣雖然嚴寒,但如果準備充足,參加得 HK100 嘅參賽者應該都可以應付,如果結霜寒冷就唔可以比賽,咁 UTMB,UTMF 呢類世界級賽事咪唔洗攪?
  2. 大會係一星期前已經知道天氣可能轉冷,已經出 email 通知參賽者作好係嚴寒天氣作賽既準備,而且每個 check point 都有熱食熱飲供應,係城門水塘有做 gear check 確保參賽者有 safety blanket 同手提,講真我覺得係香港算係其中一個安排最好的賽事,比毅行更好。
  3. 我大約兩點半係大帽山落山回終點,當時已經好多市民係山上或正在上山,條路只有一小段結霜唔算危險。所以主辨單位到五點鐘先決定腰斬賽事都算合理,太早腰斬一樣會俾人插。相信係之後大段路結霜今參賽者唔可以落嚟,身體一停產生唔到足夠熱量導至低溫(其實跑山者都知道你唔會著到一隻糉咁去跑山),其實跑到嗰個位已經成九十幾公里,如果裝備不足根本上捱唔到嗰個位。
  4. 當時好多人已經係山上扎營,其實如果佢地可以幫吓啲傷者,情況都可能會好好多。
  5. 當時唔只大帽山道塞,連荃錦公路都因為太多車上山塞死哂,所以救護車同接駁巴士都去唔到扶輪公園接啲傷者同完成嘅參賽者走,可能係咁令到更多人失溫。其實荃錦公路係主要交通龫線,就算冇傷者,警察都要做交通管制啦。

天氣同意外冇人預料到,如果一有少少情況就插主辨單位,我覺得唔係咁公平!

二.Horry

今日大量消防員被派往大帽山救人,當中不少被救者是 HK100 越野賽的選手,不少人因此指責賽會妄顧安全、選手們不自量力、浪費公共資源云云。

我沒有參加這屆賽事,但是從一些參加者口中知道大會其實非常重視參賽者的安全狀況,大會在出發前甚至向有需要的人士借用(或派發?)保暖衣服,比賽期間不少檢查站的工作人員都會主動關心選手是否夠暖(名副其實「噓寒問暖」),而大會的支援(飲食、物資、行李安排等)向來是本地賽事中首屈一指的。

大會也有要求選手携帶急緊救援裝備(太空氊、後備食物、水等),可以說能夠做的都已經做了。而且比賽出發當天(即昨天)天氣雖然寒冷,但卻遠遠不是惡劣的程度(看今年的男、女子組冠軍全破大會紀錄便知道),只是天氣變化太快,讓賽事無法順利完成。

當然或許人們可以質疑大會能否更早地腰斬賽事,但如果以此便質疑大會妄顧跑手安全就實在太個武斷。同樣地,選手們賽前也很難預計到比賽期間會遇到結霜、而賽道亦因此無法通行(過往香港出現結霜,有哪一年會令人無法下山?);他們更加料想不到會有大量市民湧往大帽山而令他們不能撤離,結果他們只能瑟縮於避風處等候救援。

市民若果因為這些不可預測的因素而將責任歸咎於選手,未免太過苛刻吧!

作為一名越野跑手,我實在不想一個在香港以至國際都甚有口碑的賽事被一些無理、不理實情的評論所破壞,如果連 HK100 (該賽事還是 Ultra Trail World Tour 2016 的首站賽事)這樣高質素的賽事都因此而停辦,那麼我想香港日後也不再需要搞其他戶外運動賽事了──說到底有哪一項活動能完全避免意外發生?

原刊於馬拉松 看世界/Run the World

馬拉松 看世界/Run the World Facebook 專頁

發表意見