立場新聞 Stand News

一年

2015/9/28 — 11:36

我無乜特別嘢想講、無嘢好懷念(瞓咗幾十晚街有乜嘢值得好炫耀?),亦唔會有料爆。

───

近日先敢睇返佔領期間影嘅相,畀我搵到呢張日出相。

廣告

到今日,我依然唔敢望到任何有關佔領嘅相片、影片、文字。望到,我會心跳加速、手心冒汗,然後一種惶恐嘅感覺湧上心頭,心情久久未能平伏落嚟(無錯,為咗賣弄腳法,對上四句全部都有個「心」字)。

我記得,一班傻仔喺927夜晚到凌晨同班仆街玩完攻防戰、再畀佔中三子趕走咗一半人、長毛再跪,大家抱住戰戰兢兢嘅心情半睡半醒,終於見到日出。

廣告

明明只係一個日出。

大家好似見到乜嘢巨大希望咁。

後來嘅嘢,無人估到係咁發生。雖然,結果一如所料。

───

我前前後後用咗一兩個月,寫咗一篇文,講返2014年9月26到28之間嘅經歷。寫到大概927,我將篇文刪咗、再清理垃圾回收筒。

瞓咗都幾十晚,最終連毛都爭唔到條。每次望到屋企一大堆呢世都可能唔會再用嘅佔領物資,我都會自問,有乜啲嘢我曾經可以做多啲而我無做到。

我諗唔到答案。

無人想失敗。失敗,並不代表你要夾硬話運動失敗係因為某某原因/人物/團體出嚟,話係佢哋搞到場運動失敗,爭唔到普選。你殺咗岑敖暉,佔領會成功?倒轉嚟講,你摺埋旺角嗰邊、啲學生早啲退場,機會又會高啲?Come on. 大家唔係藍絲,我期望你有一定嘅智商同分析能力。

有時候失敗嘅原因,根本唔係我哋嘅操控範圍度。舊年已經講咗,對住咁不撚知所謂、麻木不仁嘅政府,輸-即係上街最終未能爭取真普選-係99.9999%肯定。

政府麻木不仁,係失敗嘅原因。

所以,我依然唔認為運動失敗可以歸咎於坊間所說嘅一啲原因-大台好、今天我好、拆大台好、雙學好、本土好、衝擊立法會好、乜柒都好。

你諗返佔領最開頭嘅概念,就係諗靠住佔領嚟談判。當你佔咗全港最重要嘅三個區(金鐘、旺角、銅鑼灣; 尖沙咀同英國領事館只係佔過一陣),對方都唔同你談判,咁呢個概念開頭已經錯咗。你可以話佔領呢個判斷、決定係有問題,但一路走嚟,遊行示威訓公民廣場已經得唔到效果,佔領係成條抗爭路上嘅必然進化點。

對方唔傾。你連埋枱傾嘅機會都冇。

It is as simple as that.

───

我有參與呢場運動,呢場運動失敗咗。

但係,

我從來無悔參加過。

你要我揀坐喺屋企睇電視(雖然我屋企無電視),定係出街打一場明知會輸嘅仗?你畀我從頭再揀一次、一百次、一千次,我明知失敗,都會再去。

───

不過,有一個要求。

歌可以唱,但喺任何場合都唔好再唱「海闊天空」。

真係好撚打擊士氣。

笑一笑,世界更美妙。

 

作者facebook page

發表意見