立場新聞 Stand News

三隧分流?起路?政府識條「鐵」!

2019/1/24 — 12:21

一眾高官 1 月 19 日乘坐開篷巴士出席中環灣仔繞道通車儀式。(政府新聞處圖片)

一眾高官 1 月 19 日乘坐開篷巴士出席中環灣仔繞道通車儀式。(政府新聞處圖片)

【文:阿祺 @全民教育局 HKEd4All】

喺呢到先 recap 一下通車前一日剪好個頭嘅林太、同陳帆對啱啱先起好就成功提前三隧分流一齊塞嘅中環灣仔繞道嘅一啲願景同評價:

「……繞道落成得來不易,由 1987 年起提出於港島沿岸與建策略性道路以來,面對不少爭議……繞道通車為實施三隧分流的好機會……」— 林鄭月娥

「有公益金百萬行參加者指看見繞道隧道天花有滲水痕跡,那其實是防火塗層的紋理,會隨時間消失……係預期之內……我向大家保證,在政府嘅基礎建設裏面,係唔安全我哋係唔會開通嘅。」— 陳帆

廣告

1 月 20 號係小弟大學三年都期待以久嘅中環灣仔繞道通車的日子。大家都以為以後出入港島東西終於可以脫離干諾道同吿士打道由朝到晚都大塞的路段,不過,從新聞報導和不少在路上司機朋友的群組中得知,繞道似乎唔用好過用。

360 億起㗎喎,唔係啩?

廣告

政府嘅基礎建設裏面,係唔安全佢哋係唔會開通嘅 — 係滲水疑團仍未完全䆁除之際,指示、路牌欠奉;地綫可謂亂劃,行車綫由單白至雙白過短或不合理地劃上,更有巴士要在多條「半肥瘦」間跨三綫穿插,的士、私家車被逼切雙白線和影線,險象環生。喺通車首日出現咁嘅亂象,政府係配套上嘅規劃以至實行都盡顯官僚作風 — 看似係一班冇揸車冇路面經驗嘅人設計所出現的成品。

亂來嘅劃綫造成繞道中區出入口東西行一大樽頸,其實背後仲有政府意義不明嘅舉措:永久封閉、拆除東行林士街天橋到干諾道中嘅斜路。要用繞道嘅,我一定會用。你唔使逼我。你話怕干諾道中太塞,我可以行民吉街金融街龍和道出入中區,政府封咗東行林士街天橋斜路就係令繞道冇咗一條「搭橋」,萬一繞道有事,車輛可以點走?政府的舉措是加劇塞車問題,令車輛無路可走,造成星期一上班繁忙時間三隧成功非正式分流塞車,有隧齊齊塞。

講到塞車,唔少人當然會馬上遷怒給「自私」的私家車車主。明白嘅。我係其中一個自私精。加我牌費、加我路費想我唔揸車,我都未必會。點解?小弟家住新界西,大家出入靠一條西鐵、一條大欖隧道、一條屯門公路,計埋慢到 hihi 嘅青山公路(so-called 舊路),成幾百萬人靠呢幾條超負荷嘅交通網。平嘅有要等四班車先上到嘅西鐵、貴嘅有又係塞到 hihi 嘅西隧巴。簡單嚟講,係冇替代交通工具之前,係冇吸引力叫我唔揸車的。

記得交通工具百花齊放嘅八十年代嗎?那時有幾項重大「發明」— 船和泊車轉乘(Park & Ride)。車有汽車渡輪和接駁鐵路站嘅停車轉乘優惠,令更少嘅車使用主要道路、人有連接新市鎮到市區嘅飛翔船。喺起路等於助長汽車增長嘅左膠世界,政府要做嘅,係令一班唔想逼嘅自私精變得樂意去用公共交通工具。各位,加牌費冇用的。不過,政府識條「鐵」咋!政府對港鐵嘅縱容由工程醜聞到經營都可謂欲蓋彌彰,保鐵措施不斷,香港人只可逼上鐵路返工。係政府繼續把持鐵路為主,巴士等其他交通工具為輔嘅角色定位,三隧分流鐵定失敗。因為,星期一嘅故事話俾大家聽,俾 70 蚊啲人都照塞西隧咋!執下隧道費就分流車流?奶媽,妳太天真了!

 

全民教育局 Facebook

發表意見