立場新聞 Stand News

不可思議的香港

2015/8/13 — 17:40

賣刀,點知有人買咗把刀用嚟傷人,結果賣刀嘅畀人拉咗。

賣車,點知有人買咗架車用嚟打劫,結果賣車嘅畀人拉咗。

整「阿爸」中介Apps,點知有人用嚟無牌接生意,結果整Apps嘅畀人拉咗。

廣告

延伸手臂嘅,唔拉。

暗角打人嘅,唔拉。

廣告

用胸襲人嘅,拉。

做中介Apps嘅,拉。

彰顯公義嘅,唔做。

違反常理嘅,日日做。

呢個世界究竟有無攪錯咗?我係咪去咗twilight zone?

2013年11月6日,我喺私人面書咁樣評論香港電視攞唔到牌,對於顛覆世界嘅手機程式,今日畀人打壓,一樣啱用:

常言道:「殺頭生意有人做,賠本生意無人吼。」實牙實齒、真金白銀嘅生意佬唔驚,紙上談兵、不食人間煙火嘅「高官」幫佢驚,有無睇高咗自已嘅能力呀?」

現實話:「每年數以千計勇敢創業嘅新公司,超過九成半會係三兩年內消失,社會震蕩濕濕碎,話香港啃唔起港視加埋亞視一千幾佰友的公司仔執笠,有無咁弱雞呀?」

馬後炮:「九十年代電訊業全面開放,群雄並起,電話費大跌九成,電訊市場暴增九十幾倍,過程中有人起有人落,死傷無數,香港幾時驚過?如果嗰時行會係呢班滿口社會責任嘅人揸旗,今日打長途電話可能仲要十幾蚊一分鐘。」

我話嘅:「縱橫江湖幾十年,算係做過吓生意,識少少生意經,幾年前已經周圍同人講,成個香港淨係得番王維基一個,夠膽色,夠魄力,夠銀兩、夠創意,或者可以救得番死氣沈沈嘅電視業,雖然死亡機會一樣高過九成,但有一成機會,我都希望佢幫我哋博一博。只要唔係而家hea住做嘅電視台,係邊個做,我無所謂,當然最好係王生啦。」

睇嚟,呢個願望仔,要落空啦。頂!

今日又要頂多次。仲話攪創新科技喎!

立場新聞:由DHL到Uber — 創新嘅嘢 官僚識條鐵咩

原刊於作者 facebook

 

發表意見