立場新聞 Stand News

不如政府做到呢七招 先好公開話解決房屋問題啦

2017/7/4 — 20:50

香港私人房屋(資料圖片)

香港私人房屋(資料圖片)

之前撞到個親政府嘅城規會委員,都同我好坦白咁講,其實佢都承認解決香港土地問題根本就有好多種奏效方法。例如好多措施民間團體都講咗幾年:

1. 公地公用:大幅度改變公私房屋土地分配比例,由依家3:7變成8:2,只留番2成地俾地產商玩同買,真正做番公營主導;

2. 混合發展:以後所有私人賣地同重建嘅地契寫明底下十層都要做公屋俾普通市民;

廣告

3. 貨櫃屋邨:拎哂全港市區幾千公頃啲閒置地同可收回嘅短租起臨時貨櫃屋邨,幾百蚊租俾劏房戶,半年內咩都起好,立即拉底番成個市區租金;

4. 打假專才:嚴格審批個啲國企無端端申請一大堆假專才嘅必要性,上年已有成萬個,大大減低專才同市民爭屋住嘅問題;

廣告

5. 收審批權:收番單程證審批權,整走裡面啲特務同用不正當方法拎到證嘅水份做需求管理。

6. 限購房產:未來手頭上唔係得一間物業同外來資金嘅交易,就開徵重稅(+100%)打擊囤積/投資行為,質地產商只可以平啲賣樓俾普通市民。

7. 空置政策:吉咗個月以上嘅樓都要開徵空置稅,釋放大量租盤存量去租住市場,壓低租金。

你敢做呢七招,我敢寫包單樓價同租金一定可以回落到可負擔水平。或者咁講,不如政府做到呢七招,先好公開話解決房屋問題啦,唔好同我講技術上做唔到,呢啲全部其他國家/城市都有做過。

喺唔係冇棕地政府地嘅情況下,一講解決房屋問題就講咗去填海同郊野公園,就話唔好意思要犧牲村民同綠化帶,根本就係度擾亂視線,唔係真心解決問題。重講增加土地供應? 邊個應承過你用你嘅公帑開咗你個山造咗啲地,最尾會分多啲地俾你用架? 冇呀。聽清楚啲,政府根本冇應承過你,最後造完都係分哂俾啲科學園王國、地產財閥同政府hold起,整幾橦居屋點綴喳。

簡單啲講,香港土地問題攪成今日咁,成條隊排公屋,周街都係劏房同露宿者,唔係冇地,只係個政府一直要保著個地產市場同賣地收益唔做,唔好再老屈啲細到唔細嘅環保團體阻著你發展。

 

作者 facebook

發表意見